Qallunaat politikkerit Alcoa pillugu oqallinnermut ilanngupput

- Pilersaarut uulikullannarpoq. Maniitsoq sequmissavaa inuiaqatigiillu kalaallit  ulorianartorsiortilissallugit. Taamaaliorsinnaalernissaq peqataaffigerusunngilarput, Dansk Folkepartip nunanut allanut tungasuni oqaaseqartartua, Søren Espersen, Politikenimi ullumi neriorsuivoq.

Enhedslistenip Kalaallit Naalakkersuisuisa namminneerlutik suliamut eqqarsarluarnissamut piffissaqaqquaat, aammali isorinnillutik:

- Tunngaviusumik isummernerput nalornisigineqassanngilaq: Kalaallit Nunaanni nukiit aningaasarsiakinaaraluni sulisoqarnissanmut akiuuttut tapersersussavagut, Nunarput  pillugu oqaaseqartartoq, Finn Sørensen, oqarpoq.

Venstrep suliffeqarneq pillugu oqaaseqartartua, Ulla Tørnæs, ima oqarpoq:

- Nunarsuup ilaani sumiluunniit inuit pisinnaatitaaffeqarnissaat Naalakkersuisut nutaat aalluttupilussuuaat. Aningaasarsiakinaaralunilu sulisoqartarneq akiorniarlugu oqarpoq. Taamaammat uunga tunngatillugu Naalakkersuisut Kalaallit Nunaanni Namminersornerullutik Oqartussanut qanoq nalunaaaruteqassanersut pissanngatitaagara, Ulla Thørnæs oqarpoq.

Tassami sulisussat nunani allaninngaanneersorpassuit nunatsinnut tikinnissaat sulisinnaanissaallu danskit allamiunut tunngasutigut oqartussaasat akuerisussaavaat.

Akuersisussutinilu taamaattuni naliginnaasumik piumasarineqartarpoq, qinnuteqartoq pisarnertut aningaasarsiatigut sulinikkullu atukkat atorlugit sulissasoq.

Taamaammallu allannguisoqassagaluarpat, tamanna Danmarkip akuersaaqqaartariaqasssavaa, immaqa immikkut aaqqiilluni.

Inatsisinik atortitsinermi ministereqarfiup suliaq maanna nalilersorpaa.

- Danmarkimi naalakkersuisut kineserinik tusintilikkaanik isumaginninnikkut pisinnaatitaaffeqaratik inussiaatipajaatut sulisussanik tikisitsinissamut peqataanissaat uani eqqarsaatigiuminaappoq, Dansk Folkepartimeersoq Søren Espersen oqarpoq.

Nunanut allanut tunngasunut ministeri, SF-imeersoq Villy Søvndal, oqarpoq, Alcoamut tunngasut eqqumaffigalugit Naalakkersuisulli qanoq isummernisssaat maannakkuugallartoq apeqqutaasoq.

- Kalaallit Nunaatami immikkuullarissumik maannakkut soqutiginaateqarnerani, aporaassutissat taamattut amerlasuut takkussuutissapput. Ineriartorneq ingerlassaaq, tamannali ileqqorissaarnisssamutr akisussaassuseqarluni pissaaq, Villy Søvndal oqarpoq.

Tamanna Kalaallit Nunaata nammineq suliarisinnaagaa qularutiginngiluinnarpara,Villy Søvndal Politikenimut oqarpoq.