Qallunaat naalakkersuisui Qimaasuujumasunut itigartitaasunut Kangilinnguani inissiigallartarfiliussaanngitsut

Mattias Tesfayep nunarput itigartitaasunut inissiigallarfittaarumanersoq aperiumanngilaa.
Danmarkimi qimaasuujumasunut, itigartitaasimasunut Kangilinnguani sakkutooqarfikumi inissiigallartarfiliortoqarsinnaanersoq, nunat allamiunut akuulersitsiniartarnermullu ministerip Mattias Tesfaeyip Naalakkersuisunut apeqqutiginianngilaa. Assi © : Scanpix
Allattoq Ritzau
maajip 06-at 2021 12:24

Danmarkimi qimaasuujumasunut, itigartitaasimasunut pinerluuteqarsimasunullu, angerlartitaasussanut Kangilinnguani sakkutooqarfikumi inissiigallartarfiliortoqarsinnaanersoq, qallunaat naalakkersuisui nunatsinni naalakkersuisunut apeqquteqassasoq, Dansk Folkeparti siunnersuuteqarpoq.

Kisianni nunat allamiunut akuulersitsiniartarnermullu ministerip Mattias Tesfaeyip taamaaliorusunnani, Folketingemi oqaluttarfikkut akivoq.

- Nunat allamiut qimaasutut akuerineqarumagaluarlutik itigartitaasut pillugit ungasinnerusoq eqqarsaatigalugu aaqqiisoqartariaqartoq siunnersuuteqartut isumaqatigaakka, taakkuami aamma angerlassapput, Mattias Tesfaye oqarpoq.

Nunat allamiut qimaasuujumasut itigartitaasut maanna Ikastimi Kjærshovedgårdimiittarput, tamaaniinnerallu eqqaamiuinut sunniuteqarpoq.

Danskit naalakkersuisui aqqissutissamik aasaanerani sulinngiffiutinnagu saqqummiussiniartut, Mattias Tesfayep Folketingemi oqaatigeriikkani uterpaa.

AAMMA ATUARUK Dansk Folkeparti: Nunamut qimaasutut iserniartut itigartinneqartut Kangilinnguanut nassiunneqarlik

- Qimaasuujumasut itigartitaasut najugaqarfigigallagassaannik Kalaallit Nunaanni pilersitsinissaq aaqqiissuutissaanngitsoq isumaqarpunga. Aamma taamaaliornissaq qimaasujumagaluartut amerlanerusut angerlakaatinnissaannik naalakkersuisut pilersaarutaanni ilaanngilaq.

- Qimaasuujumagaluartut itigartitaasunut Kalaallit Nunaanni inissiigallartarfiliornissaq isumatusaarnerusutut isiginngilarput. Paasisakkalu malillugit Namminersorlutik Oqartussat aamma taama isumaqarput.

- Taamaammat Kalaallit Nunaata naalakkersuisuinut nutaanut saaffiginninnissamut pissutissaqanngilaq, Mattias Tesfaye oqarpoq.

Venstrep nunami allamiunut tunngasuni oqaaseqartartua, Mads Fuglede, inimi ataatsimiittarfissuarmi ima oqarpoq:

- Kalaalli Nunaata namminersortuunera assorsuaq ataqqivarput. Taamaammat taama oqallittoqalertinnagu, Kalallit Nunaanniit taama ittumik kissaateqartoqaqqaartariqarpoq.

- Tamatuma saniatigut isuma eqqarsaatigilluagaananilu akisorpasippoq, attanneqarsinnaasumillu aaqqiissutaarpasinnani.

Venstrellu siunnersuut taamaalilluni tapersinngilaa, Naalakkersuisullu periarfissamik misissueqqunissaanik amerlanerussusiisussaqanngilaq.