Meeqqanut, Inuusuttunut Ilaqutariinnullu Naalakkersuisoq Mads Pedersen (IA) kalaallit meeravissianngortinneqarsimasunut eqimattanut, qallunaat naalagaaffianniit taarsiiffigineqarnissamik kissaateqartunut suliamut akuliuppoq.

Nunatsinniit Danmarkimut meeravissianngortinneqarsimasut sisamat 1950-ikkunnit 1970-ikkunnut ilaqutaviminnit peersinneqarnerminni inuttut pisinnaatitaaffitsik unioqqutinneqarsimanerarlugit, katillugit 1 millionit koruuninik taarsiiffigineqarnissamik piumasaqaatertik siorna inuiattut ullorsiornitsinni 21. Juuni nassiuppaat. 

Taarsiiffigineqarnissamik piumasaqaatip itigartitsissutigineqarsimanera ataasinngornermi KNR-imit oqaluttuarineqarsinnaanngorpoq. Suliat pisoqalisimaneri pissutigalugit piumasaqaat isumaginninnermi ministeriaqarfiup itigartippaa.

Tamatuma saniatigut ministereqarfiup meeravissianngortitsinermut malittarisassat taamani atuuttut suliani sisamani malinneqarsimannginnerannut naammattunik paasissutissaqanngissoraa. 

Mads Pedersenili tamatumunnga isumaqataanngilaq. Qallunaat isumaginninnermut ministerianut Sophie Hæstorp Andersenimut allakkani ammasuni “tunngavilersorluagaavoq, meeravissianngortitsineq angajoqqaaviusunit atuuttuusumik akuersissutitaqanngitsumik pisoq” taanna allappoq. 

- Pisuni amerlasuuni utaqqiisaasumik paarineqartussaasut angajoqqaat isumaqarsimapput. Tamanna angajoqqaajusut meeqqallu pisinnaatitaaffiinik unioqqutitsineruvoq, taanna allakkamini allappoq nangillunilu:

- Taamaattumik Isumaginninnermut- Ineqarnermullu ministerip taarsiiffigineqarnissamik piumasaqaammik itigartitsinera, innersuussutigalugu ‘taamani meeravissianngortitsisarnermut malittarisassanut atuuttunut’  kingorna meeravissianngortitsinerit pisimammata pakatsinarluinnarpoq.

- Tamakku malittarisassarpassuit naammanngitsut ullumikkut ilisimavarput, taamanilu meeravissiartaartarneq paasisassaanngitsumik amigartumillu akuersisitsinermik ingerlanneqartarpoq. Qanga inatsisinut toqqortiinnartoqarsinnaanngilaq, taamak kinguneri sakkortullutillu sivisutigut. 

Suliassanngorteqqittariaqarpoq

Suliaq ammaqqinneqassasoq aammalu aalajangiineq nalilersorneqaqqissasoq, naalakkersuisoq maanna qinnuiginnippoq.

- Pineqartut ilaqutaasalu ajortumik pineqarsimanerat pillugit, Iluarsiissutissamik, aningaasat kisiisa pinnagit aammali tarnikkut,  Danmarkip naalagaaffianit nassuerutiginnittariaqarput.

- Ukiut kingulliit ingerlaneranni kukkunerit pisimasut, kiisalu kingunerluutaasut maanna suli atuuttut pillugit, Danmarkip naalagaaffittut akisussaaffimmik tigusinissaa pingaaruteqarpoq. Misigissutsikkut anniarneq kiisalu oqaluttuassartaa – inuit nalinginnaasumik imaluunniit eqqunngitsumik meeravissianngortinneqartut eqqarsaatigalugit – Danmarkip naalagaaffianiit tamanna eqqarsaatigineqanngimmat uggornarpoq, Mads Pedersen allakkamini allappoq.

Inuttut pineqarnissamik itigartitaaneq

Margrete Johansen aammalu Marius Kristensen, taakkuupput marluullutik aningaasatigut taarsiivigineqarnissamik piumasaqarniartut. Aalajangiinermut naammagisimaarinninngillat.

- Inuttut pineqarnissamut itigartitaasutut aamma inuunera appasissumik nalilerneqartutut misigaaga. Taamaattumik inerniliussaq eqqarsaatigalugu kamaammerpunga, Margrete Johansen, 74-inik ukioqartoq, KNR-mut ataasinngornermi oqarpoq.

Margrete Johansen (saamerleq) aamma Marius Kristensen (talerperleq), socialministerip piumasaqarnerminnut itigartitsineranut ugguarput.  Assi © : Private fotos

Suliaq eqqartuussivimmut ingerlateqqissallugu piareersimapput

– Taarsiivigineqarnissaq uannut pingaaruteqaqqissaanngilaq. Pingaarnerpaavoq pisortat – inuiaqatigiit sinnerlugit –kukkuneq annertooq pisimasoq nassuerutigissagaat. Taamaattumik utoqqatserneq tusassallugu uannut isumaqartorujussuussaaq. Isumaginninnermut aaqqissuussinermi kukkunerit annertuut nassuerutigineqarlutik utoqqatserfigineqarnissaat pingaaruteqarpoq, Marius Kristensen oqarpoq.

KNR-ip suliaq pillugu isumaginninnermut - ineqarnermullu ministeri Sophie Hæstorp Andersen apersorniarlugu pissarsiariniarsaraa.