Aalisapilunneq: Qalerallit Nuup eqqaani pisat 40 procentinik oqinnerulersut

Nuup eqqaani qaleraleqassuseq aalisapiluttoqarneranit ulorianartorsiortinneqaratarsinnaavoq. Qalerallit Nuup eqqaani piffissami 2010-mit 2018-imut pisarineqartut oqimaassutsimikkut agguaqatigiissillugu 40 procentinik oqinnerulersimasut Aaliasarnermut naalakkersuisup ilisimatitsissutigaa.
Nuup eqqaani qalerallit aalisapilunneqarnissamut ulorianartorsiortinneqarput. Assi © : Forsvaret
marsip 21-at 2019 07:52
Nutserisoq Simon Uldum

Nuup eqqaani ullumikkut killeqanngitsumik qalerinniartoqarsinnaavoq, tamaanga immikkut pisassiisuteqanngimmat. Nuup eqqaani qaleralinnik piffissami 2010-mit 2018-imut agguaqatigiissillugu 810 tonsinik pisaqartoqarsimasoq aalisarnermut naalakkersuisup ilisimatitsissutigaa. 2013-imit nuna tamakkerlugu agguaqatigiissillugu ukiumut 1100 tonsit tulaanneqartarput.

Qalerallit Nuummut tulaanneqartartut agguaqatigiissillugu angissusiat 2010-mi 56 centimeterinit 2017 aamma 2018-imi 48 centimeterinut milleriarsimapput.

- Milleriaatsit aalisakkat ataasiakkaat oqimaassusaat aallaavigalugit 1,5 kiilunit 900 grammit missaanut oqileriarsimapput, Nikkulaat Jeremiassen taama allappoq.

Inatsisartunut ilaasortap Inuit Ataqatigiinneersup Sofia Geislerip tamatumunnga atatillugu paaserusuppaa qalerallit pisarineqartartut amerlassusiat qalerallillu pisarineqartut milliartornerat imminnut atassuteqarnersut.

Naalakkersuisoqarfiup tamatumunnga akissutaa tassaavoq 2010-mit qaleralinniarnerup annertuallaarsimanera ilimanartoq.

Mianersoqqussut: Kingullermik aalisarneq ukiuni 20-ni ajutoortinneqarpoq

Naalakkersuisoq Nikkulaat Jeremiassen piffissamut 1988-ip siornanut aamma assersuussivoq. Ullumikkummi pisarineqartartut 1988-imi Nuummi qaleralinniarnermi pisarineqartartut annertoqatigingajammatigit.

Taamani aalisarneq Nuup eqqaani ukiuni 20-ngajanni qaleraleqarunnaarneranik kinguneqarpoq.

- 1989-imit 2009-mut ukiumut pisarineqartartut agguaqatigiissillugu 50 tonsit missaannaanniissimapput, Nikkulaat Jeremiassen taama allappoq.

Aalisarnermut naalakkersuisup ilisimatitsissutigaa Nuup kangerluata aqutsiveqarfinngortinneqarnissaa sulissutigineqartoq, siunissami piujuaannartitsinissamik tunngaveqarluni aalisartoqarnissaa siunertarineqarluni. Qaleralinniarnerulli pisassiissutit tunngavigalugit ingerlatilernissaa suli ullulerneqanngilaq.

Nuup eqqaanut pisassiissuteqarnissaq 2015-imili sulissutigineqalerpoq, politikerillu maannamut tamanna iluatsissinnaasimanngilaat.

Nuup kangerluanut 500 tonsinik qaleralittassiisoqarnissaa Pinngortitalerimmit siornatigut aamma inassutigineqaraluarpoq.