Qaasuitsup Kommunia marlunnut avinneqartussanngorpoq
Kommuninngortussat marluusut inuiaqatigiillu ataatsimoorlutik kommunit avinnissaat akilissagaat aalajangiunneqarpoq.
Demokraatit kisiartaallutik isumaqataanngillat.
Kommuninut aappaagu qinersisoqalerpat Qaasuitsup Kommuniani innuttaasut Ikaarsaariarnermi ataatsimiititalianut marlunnut qinersissapput, 2017-imilu kommunit avinneqarnissaannut piareersaassallutik.
Akiligassaq aamma avinneqassaaq
Siornatigut akerlianik nalunaarutigineqaraluartoq Qaasuitsup Kommuniani innuttaasut kommunip avinneqarnissaa kisimiillutik akilernavianngilaat.
Naalakkersuisummi Qaasuitsup Kommuniata avinneqarnissaanut aningaasaliinissamut piareersimapput. Inatsisinik atuutsitsinermut ataatsimiititaliap tapiissutissatut aningaasaliinissamut isumaliutissiissutaanni tamanna takuneqarsinnaavoq.
Aamma atuaruk Naalakkersuisut kommunip avinnissaa akilissagaat
Kommunip avinneqarnissaanut 2017-imut aningaasanut inatsimmi 5 millionit koruuninik immikkortitsisoqarpoq, aappaaguanilu 3 millionit koruuninik immikkoortitsisoqarsimalluni, aningaasartuutissatullu takorloorneqartut affangajarivaat.
Aalajangiineq oqartussaaqataanermut naapertuutinngilaq
Qaasuitsup Kommuniani innuttaasut amerlanerussuteqarluartut kommunip avinneqarnissaanik 2014-imi taasipput. Aningaasalli tungaatigut kingunissat innuttaasut ilisimaneraat Demokraatineersup Michael Rosingip apeqquserpaa.
Demokraatit isumartik isertorniarnikuunngilaat, tassami isumaqaramik kommunip avinneqarnissaa Qaasuitsup Kommunianit akilerneqartussaasoq, nunap sinneraniinngitsoq.
Aamma atuaruk Amerlanerussuteqarluartut kommunip avinneqarnissaa taperserpaat