Politikki

Qaasuitsup Kommunia avinneqassanngilaq

Aaqqissuussaanermut Isumalioqatigiissitap isumaliutissiissutaani periutsit aalajangiusimaneqarput. Kommunimimmi ataatsimik kommuninilluunniit arlalinnik avitseqqittoqassagaluarpat tamanna inuiaqatigiinnut akisuallaassaaq.

Allattoq Inge S. Rasmussen

februaarip 23-at 2016 06:13

Nutserisoq Mads Lynge

Kommunit angissusaat pillugu nalunaarut Naalakkersuinikkut Ataqatigiissaarisoqatigiinnit saqqummiunneqarpoq. Ataqatigiissaarisoqatigiit tassaapput KANUKOKA, borgmesterit sisamat Naalakkersuisullu. Taakku februaarip ulluisa 16-ianni kingullermik naapipput.

Kommunit Siumumeersumik borgmesterillit pisortat suliffiinik Nuummit sinerissamut nussuinissamik pillugu takorluukkatik ulloq taanna saqqummiuppaat.

Aamma atuaruk Qaasuitsup Kommunia avinneqartussanngorpoq

Kommunit 2009-mi kattussuunneqarmatali Qaasuitsup Kommuniani innuttaasut taasitinneqarput, kommunillu marlunngorlugu avinneqarnissaa kissaatigineqartoq paasinarsilluni.

Paaissutissalli taasisitsinermut tunngaviliisut naammanngillat, Naalakkersuisut siulittaasuat Kim Kielsen tusagassiorfinnut nalunaarummi taama ilaatigut allaaserisaqarpoq:

- Qaasuitsup Kommuniani avitsinissaq pillugu inunnik taasisitsinissaq sioqqullugu innuttaasut aningaasaqarnikkut kingunerisinaasaat pillugu paasitinneqarsimanngillat. Innuttaasunut kommunip avinneqannginnerani kingunerisinnaasaanik ilisimatinneqartariaqartut Naalakkersuisut isumaqarput, Kim Kielsen taama oqarpoq.

Aamma atuaruk NALILIINEQ Kommuninik aaqqissuusseqqinnissaq Siumup kisermaappaa

Kommunit ataasiakkaat suliassanik kivitsisinnaassappata aalajangersimasumik angissuseqartariaqartut Kim Kielsen oqarpoq:

- Kommuninik A, B imaluunniit C-mik pilersitsissanngikkutta allatut ajornartumik, Aaqqissuussaanermut Isumalioqatigiissitamit 2005-imi naliliivigineqarsimasutut kommuneqartariaqarpugut suliassanik naammassinnissinnaanissanik pitsaasumik piumasaqaatinut kivitsisinnaasunik, Naalakkersuisut siulittaasuat oqarpoq, nangillunilu:

- Aammaarlunga erseqqissaatigissavara, pingaarnerunngimmat innuttaasut Namminersorlutik Oqartussanit kommuninit sullissinermik isumaginnittuuppata, pingaarnerpaavorli innuttaasunut pitsaanerpaamik pimoorussinerpaamillu sullissineq angusinnaassagatigu, Naalakkersuisut siulittaasuat Kim Kielsen naggasiilluni oqarpoq.

Aamma atuaruk Immikkut ilisimasalik: Qaasuitsoq avinneqarnavianngilaq

Aamma atuaruk Qaasuitsup kommuniata avinneqarnissaa isumaqatigiinngissutaavoq