Immikkut ilisimasalik: Qaasuitsoq avinneqarnavianngilaq
Taasinerup inernera Naalakkersuisunit imaluunniit kommunalbestyrelse-mit malinneqarumaartoq, Roger Buch-ip qularaa, tassami kommuni avinneqassappat tamanna akisuupilussuupilussuusinnaammat.
- Taasinerup inernera politikerinit tusaaniarneqartariaqartutut oqaatigineqaraluartoq, taamaattoq oqartariaqarpunga kommunip avinneqarnissaa qularalugu, tassami taamaaliussagaanni tamanna akisuupilussuusussaavoq.
Roger Buch taama oqarpoq. Taanna Nunatsinni kommunit aaqqissuuteqqinneqarnerisa nalaani, kommunillu 2009-mi ikilisinneqarnerannut malinnaalluatuuvoq.
Qaasuitsup Kommuniata avinneqarnissaanut tikkuussisussamik ippassaq taasinermi, qinersisinnaatitaasut affaannaat taasiartorput, taakkunannga 79 procentit kommunip avinneqarnissaannik kissaateqarlutik taasillutik.
Sumiiffiit ataasiakkaat oqartussaaqataarusunnerat, taasinerup inernerisa takutikkaat, Roger Buch isumaqarpoq.
- Kalaallit Nunaanni kommunit aaqqissuussaanerisa kingorna, kommunit taama angitigisut pilersinneqarneranni oqartoqarsinnaanngilaq sumiiffinni ataasiakkaani oqartussaaqataaneq salliutinneqarsimasoq, Roger Buch oqarpoq.
Qaasuitsup Kommuniata borgmesteria, Ole Dorph, Siumut kommunip avinneqarnissaanut isumaqataanngitsoq, Radioaviisimut ullaaq oqarpoq, taasinerup inernera politikerinit tusaanngitsuusaarneqartariaqanngitsoq.
- Taasineq ersarippoq, tassa kommuni avinneqartariaqartoq innuttaasut isumaqarput, tamannalu politikerinit tusaanngitsuusaarneqarsinnaanngilaq naak taamaallaat qinersisinnaatitaasut 52 procentii taamaallaat taasiartorsimagaluartut, Ole Dorph oqarpoq.
Taaseqataasut 52 procentiusut amerlanersaasa, kommunip avinneqarnissaa isumaqatigaat, taakku kommunip avannaatungaani illoqarfinni nunaqarfinnilu najugaqartuullutik. Aamma kommunip kujasinnerusuani najugaqartut, tassa Aasiammiut eqqaamiuisalu avinneqarnissaa isumaqatigaat. Tamassumalu takutippaa, illoqarfittut pingaarnersatut taaneqarsinnaasumi, tassa Ilulissani najugaqanngitsut kommunip avinneqarnissaanik isumaqataanersut. Tamannalu takornartaanngitsoq, roger Buch-ip oqaatigaa.
- Kommunip iluani sumiiffiit inukkinnerusut kommunerujussuanngornerni aaqqissuusseqqinnermilu salliutinneqarneq ajortut takuneqartareerpoq.
Tusagassiortunngorniarfimmi Aarhusimiittumi, kommunit pillugit ilisimatusarnermi pisortaq, ph.d. Roger Buch taama oqarpoq.
Kommunit aaqqissuussaanerisa kingorna, illoqarfiit isorliunerusut nunaqarfiillu eqqugaasimasut, tassa inukkilliartorsimasut Roger Buch-ip oqaatigaa, tamannalu taasinermi takuneqarsinnaasutut oqaatigineqarsinnaasoq oqarluni.
