VIDEO Qaasuitsup Kommunia avinneqartussanngorpoq
![](/sites/default/files/styles/image_934x467/public/oembed_thumbnails/2022-12/QpC1dFlbc_6LirCYbY9BQ84yq5-fWU_jl8-g8mLQkk8.jpg?itok=qUP1_SBe)
- Qinigaaffiup matuma aallartinnerani tamatuma qaqinneqarnissaa qularutiginngilarput.
Taamaammat Atassutip tungaanit neriuutigaarput kommunini qinigaaffiup tullia nallertinnagu aaqqissuusseqqinnerit pisussat apeqqutaatillugit suliaq naammassineqarumaartoq.
- Kisianni qanorluunniit qinigaaffimmi matumani suliaralutigu aallartinniarparput, Knud Kristiansen KNR-imut oqarpoq.
Isumaqatigiissut suliassanik akisuunik amerlasuunillu imaqarpoq
Naalakkersuisooqatigiinnissamik isumaqatigiissummi pingaartitat tamakkerlugit qinigaaffimmi ukiuni tullerni sisamani piviusunngortinnissaat pisinnaanngitsoq Atassutip siulittaasuata nassuerutigaa.
- Aaqqissuusseqqinnerit pisariaqartut aallartisarneqarnissaat pingaarnerpaajuvoq. Ilarpassui piviusunngortissinnaavagut, ilaallu aallartisarneqareerput, taamaammat isumaqatigiissutigisarput naapertorlugu ingerlateqqiinnassavagut, Atassutip siulittaasua oqarpoq.
2014-imili 275 millionit koruunit missaannik amigartooruteqarneq naalakkersuisooqatigiinnissamillu isumaqatigiissut angusaqarfiulluarniartoq aningaasalersuinissamik pisariaqartitsissapput, Knud Kristiansenillu nunanit allanit aningaasalersuerusuttut isumalluutigai.
- Ullutsinni suulluunniit akisuupilussuupput aamma inuiaqatigiit ingerlanneqarnerat akisuupilussuuvoq. Mittarfissaq eqqarsaatigissagutsigu nunanit allanit aningaasalersuerusuttut angisuut pisariaqartinneqarnerat ersarippoq.
- Tamakkuli siunissamut aningaasaliinerussapput angalanissamullu periarfissat eqaannerusunngortinneqarpata tamanna inuussutissarsiutinik ingerlaqartunit iluaqutigineqartussaassaaq.