Qaasuitsup Kommunia: Angutit 19-it Arnat marluk!!

Kommunalbestyrelse qinigaarlaaq taamaallaat marlunnik arnartaqarpoq, tassa Inuit Ataqatigiinneersoq, Ane Hansen, aamma Atassummeersoq, Naja Petersen.

Marluullutik naalakkersuisunut ilaasortaasimapput, neriussaagut anguterpassuit 19-it kommunalbestyrelsimi nutaami suleqatiginialerunikkik tamanna sukasaatigisimassagaat. Taakkunannga Siumukkormiorpassuit 13-it arnartaqanngitsut.

Kommunini allani arnat angutillu agguataarneri kusanarnerujussuupput.

Qeqqata Kommuniani angutit qulit arnallu tallimat. Siumukkormiut tassani aamma angutaannangajaapput, inatsisartunut ilaasortanngorlaaq, Evelyn Frederiksen, arnartatuaavoq, Atassut marlunnik angutitaqarluni marlunnik aamma arnartaqarpoq, Inuit Ataqatigiit 100 procentimik arnanik Qeqqata Kommuniani sulisitaqassapput marlunnik isertitsigamik - tassani aappaalluni naalakkersuisunut ilaasortaasimasoq, Agathe Fontain.

Kommuneqarfik Sermersuumi Kommuni Kujallermilu angutit arnallu ullutsinnut naleqqunnerusumik agguataarsimapput.

Kommuneqarfik Sermersuumi angutit qulit arnallu qulingiluat. Qinersinermi angutit arnallu agguataarnerisa nikingavallaarnera iluaquserneqarpoq, nuna tamakkerlugu qinigaanerpaammata Asii Chemnitz Narup aamma Martha Abelsen.

Kommune Kujallermi arnat angutillu agguataarnerat ajunngilluinnarpoq, angutit arfineq-pingasut arnallu arfineq-marluk.

Kommunini sisamani taakkunani innuttami sullilluarnissaanut sorleq piumassuseqqortunerussanersoq piffissap takutikkumaarpaa.