Qaarsuni illut kvadratmeterimut 41.950 koruuneqartut

Uummannap sulluani nunaqarfimmi mittarfeqarfiutigisumi, Qaarsuni, Mittarfeqarfinni sulisunut tallimanik illuliortoqassasoq Naalakkersuisut 2021-imi aalajangerput.

Illut taakkua tallimat Illorput 2021-imik taaguuteqarput. Illut tallimat katillutik 550 kvadratmeteriusut annertussuseqartut, KNR-ip allagaatinik ineqarnermut attaveqaasersuutinullu naalakkersuisoqarfimmeersunik, noqqaassutaani paasinarsivoq. Illu ataaseq pingasunik sinittarfeqarpoq.

Illut tallimat taakkua sanaartornerat 23 millionit koruuninik imaluunniit kvadratmeterimut 41.950 koruuninik akeqarpoq. Tamanna akileraartartut aningaasaataannit, tassa nunap karsianit, akilerneqarpoq.

KJ Greenland A/S, sanaartorusuttuni akikinnerpaamik neqeroortuugami sanaartortuuvoq. Namminersorlutik Oqartussat sanaartortitsisuupput.

Upalugaarsimaneq

Qaarsut nunaqarfiat ajornerpaamik pisoqarluni tassaarsuassagaluarpat aarlerinartumi inissisimasoq Namminersorlutik Oqartussat naliliinikuupput. Tamannalu naliliineq tunngavigalugu illut tallimat tassaarsuaqaratarsinnaaneranut aarlerinanngitsumi inissillugit sanaartorneqarput. Taakkua Qaarsut mittarfiata unnuisarfiatalu ungasinngisaani, qatsissumi, inissisimapput.

Illut ajornerpaamik pisoqassagaluarpat mittarfiup ingerlaannartussaaneranut upalugaarsimanermullu qulakkeerinnissasut, Mittarfeqarfiit nittartakkaminni, 2023-imi januaarip 26-anni allapput.

Nunagissaaneq akisooq

Illut taakkua tallimat nunaqarfinni ullumikkut nalinginnaasumik sanaartortariaatsimut assigusumik sanaartorneqanngillat. Taakkuami ulluinnarni pisariaqartitanik, soorlu imermut kuuinnartumut attavilersugaapput kuutsinneqarsinnaasunillu perusuersartarfeqarlutik.

Tamannalu illut akiisa qaffasinnerannut peqqutaaqataavoq. Ulluinnarnimi pisariaqartitanut, soorlu imermut attavilernagit tankilersuinnarneqarsimappata, kuutsittakkanillu perusuersartarfilernagillu kiassakkanik kuuffilerneqarsimanngikkaluarpata illut 13.2 millionit koruuninik akeqassagaluartut allagaatini allaqqavoq. Qaarsuni illuliorfissap nunagissarnera aningaasartuutinut aamma akitsorsaaqataavoq.

Namminersorlutik Oqartussat KJ Greenland A/S suliami 21.3 millionit koruninik akilerpaa. aningaassartuutit sinneri 1.7 millionit koruunit missaat sanaartortitsisut nakkutilliinernut, allaffissornernut sillimmasiinernullu aningaasartuutigaat.

Sanaartorneq naammassiumallugu Naalakkersuisut Inatsisartut aningaasaqarnermut akileraartarnermullu ataatsimiititaliaannut aningaasaliinissamik qinnuteqaataat, ataatsimiititaliap taamani akueraa.