Qaannamik parrunneq: Karoline Nielsen VM-mut annguppoq
Qaannamik parrunnermi inuusuttuaqqat EM-qarnerat sapaammi Polenimi illoqarfimmi Poznanimi naammassivoq, tassanilu 18-nik ukiulik Karoline Nielsen Uummannap sulluani Saattormiunik ilaqutaqartoq A-finaleni marlunni peqataavoq.
Maanna tass septemberip aallartilaarnerani Portugalimi VM-qarnissaani peqataasussanngorpoq qallunaat sisamaattarissami A-finalemi arfernattut inissimmata.
AAMMA ATUARUK Qaannamik parrunneq: Karoline Nielsen EM-mi finalemut annguppoq
- Assut ingerlalluarpugut naak naggataani nukitsinnik amikkittooraluarluta. Assorsuaq naammagisimaarinnippugut pingajuattut inissinnissamiit sekundi ataasiinnaq amigaatigigatsigu, Karoline Nielsen KNR-mut oqarpoq.
Qallunaat qajaat sisamaattariaq unamminerup aallartinnerani siuartunut ilaagaluarpoq naggataanili nukinnik amikkitsisoqarluni.
- Finalep qiterpaarnerani tullersortitut inissikkaluaratta assorsuaq pissanganarpoq. Apuukkiartortarnerput maanna iluarsiniassavarput aamma niviarsissat iligisama sungiusaqatiginnissaat qilanaareqaara pitsaaqimmata, Karoline Nielsen oqarpoq.
AAMMA ATUARUK Qaannamik parrunneq: Karoline Nielsen EM-mut toqqagaavoq
Kisermaattarissami aamma A-finalemut annguppoq tassanilu arfineq aappaattut inissilluni. Arfernattut inissisimasuuguni toqqaannartumik VM-mut anngussimassagaluarpoq. Maanna kisimiittarissami taamatut inissinneq kiisalu sisamaattarissami toqqaannartumik VM-mut anngunneq kisimiittarissami VM-qataanermut anngussutaasinnaanersoq tusarsiivoq.
Karoline Nielsen maanna angerlarsimaffimmini Silkeborgimeeqqilerpoq aasaaneranilu Silkeborgip tasiini sungiusangaatsiarnissamik ilisimasulereerluni.
- Ullormut minnerpaamik marloriarluta immaqalu pingasoriarluta sungiusartartussaavugut. Imaassinnaavoq aamma VM sioqqullugu arlaannut sungiusariaqatigiittugut, Karoline Nielsen sisamaattarissami VM-mut anngunnermigut sungiusarnissamut assut piumassusinissimanerartoq oqarpoq.
Royal Arctic Linep aningaasaliisuunera assut qujamasuutiginerarpaa maannalu suli allanik aningaasaliisussarsiorpoq sungiusarnini tamakkiisumik ingerlasinnaajumallugu.