Qaannamik parrunneq: Karoline Nielsen EM-mi finalemut annguppoq
Karoline Nielsen qallunaat nunanut allanut unammisartui sinnerlugit ataasiuttarissami qaannamik parrunnermi inuusuttuaqqani EM-qataanermini finalemut anngunnermigut anguniakkani anguaa. Sisamaattarissami aamma finalemut aamma finalemut anngupput maannamut sukannerpaaffitsik semifinalemi qaangeramikku. Paattaat maanna itoqqisimagallarput sapaatiuppat finalertoqarnissaata tungaanut.
Karoline Nielsen semifinalemi sisamaattut inittumit sekundi ataallugu sukkanerulaarnermigut finalemut annguppoq Polenimi Poznanimi sapaatiuppat finaleqaassalluni.
- Taama sakkortutigisumik unammillerneqarlunga unammineq misilinnikuugunanngilara. Niviarsiaqqat unammisakka nukittoorujussuupput assorsuarlu sukkallutik, Karoline Nielsen KNR-mut oqarpoq.
Timikkut tamaviaarnerup saniatigut eqqarsaatsikkut tamaviaarluni siulliusut akornanniinniarsarivoq.
- Sukkanerat puullaaqissutigaara. Taava eqqarsarpunga imminut tatigalunga qasujaassusera tatiginiarlunga. Taamaasillunga pingajuattut inissillunga sisamaattut inissittumiit 0,07 sekundimik siulliulaarpunga, Karoline Nielsen oqaluttuarpoq.
Finaleqqissaaq
Aamma sisamaattarissami unammeqataavoq tassanilu qallunaat angusarissaartarput. Tassanilu anguniagartik aamma angullugu finalemut anngupput.
AAMMA ATUARUK Qaannamik parrunneq: Karoline Nielsen EM-mut toqqagaavoq
Ukiormanna kingusinnerusukkut Portugalimi VM-rtoqartussaavoq tassungalu anngunnissamut EM-mi minnerpaamik arfernattut inissinnissaq piumasaqaataavoq.
- Sisamaattarissami finalemi siuartut akornanniinnissarput ilimagaara, Karoline Nielsen oqarpoq.
Kisermaattarissami aamma sapaatiuppat ullaakkut finalemut pitsaanerpaanik neriuuteqarpoq.
- Niviarsiaqqat finaleqatissakka assorsuaq nukittugunarput, kisianni minnerpaamik arfernattut inissikkusuppunga toqqaannartumik VM-mut peqataasussattut toqqagaaniassagama, Karoline Nielsen oqarpoq.
AAMMA ATUARUK Parrunneq: Karoline Nielsen qallunaat U-18-ni nunanut allanut unammisartuiniilerpoq
Taanna Nuummi inunngorpoq Danmarkimilu qajartortalerluni maanna Silkeborgimi qajartortartuulluni.
Qajartornermik soqutinnilerfigisaa tassaavoq aatani Uummannap eqqaani Saattormiu kalaallit qajaannik qajartortartoq.
