Qaannamik parrunneq: Karoline Nielsen EM-mut toqqagaavoq

Karoline Nielsen, Silkeborgip tasiini sungiusartartoq, inuusuttuaqqat Europami pissartanngorniutilerpata Danmark sinnerlugu junimi unammeqataassaaq.

Taanna Danmarkimi najugaqarpoq ilaqutaalu Uummannap eqqaani Saattormiuupput.

EM-mut toqqagaavoq taannalu VM-mi peqataanissamut alloriarnerusinnaasoq toqqagaaniulluni unammisaqattaarnermi anguaa.

- Assut paarluarpunga ingerlalluataarlungalu. Taamaattoq sapaatip akunnera sioqqullugu taama paarluartiginngikkaluarpunga. Ingerlalluaqaangali, Karoline Nielsen KNR-mut oqarpoq.

AAMMA ATUARUK Parrunneq: Karoline Nielsen qallunaat U-18-ni nunanut allanut unammisartuiniilerpoq

EM-mi peqataaniartunut piumasaqaataavoq Europami kakkannerit aqqaneq marluk akornanniissinnaalluni ingerlarsornissaq Karoline Nielsenillu qaannani aallarsartilluarpaa.

EM-mi ataasiakkaarnermi aammalu sisamaattarissami unammeqataassaaq taannalu qallunaat nunanut allanut unammisartuisa ukiorpassuarni angusarissaarutigisarpaat.

- Soorunami nerioqaanga A-finalemut anngutissallunga tamannalu anguniarlugu tamaviaarumaarpunga. Aamma misigisimavunga sisamaattarissami A-finalemut anngunnissamut assut periarfissagissaarluta, Karoline Nielsen oqarpoq.

Toqqagaaniulluni qanittumi unamminermi timimigut piareersimalluarnini takutippaa. Taamaattoq:

- Eqqarsartaatsigut unammitinnata iluarsiniagassaqarpunga. Tassami pissangarujussuarsinnaasarpunga, Karoline Nielsen oqarpoq.

- Kisianni pissanganeq taanna pitsaasuuvoq tamaviaarutigissavaralu, Karoline Nielsen oqarpoq.

Ukiormanna kingusinnerusukkut inuusuttuaqqat VM-tussaapput EM-milu angusarissaarnikkut VM angusinnaassallugu Karoline Nielsen neriuppoq.

Karoline Nielsenip aataa Saattormiu kalaallit qajaannik qajartortartuuvoq.

Nammineq pingasunik ukioqarluni ilaquttanilu Danmarkimut nuunnermi kingorna qajartortalerpoq.