Karoline Nielsen maanna Royal Arctic Linemit aningaasaliiffigineqartarpoqAssi: Torben Anholm

Parrunneq: Karoline Nielsen qallunaat U-18-ni nunanut allanut unammisartuiniilerpoq

Qaannamik paarluni sukkaniuttartoq Karoline Nielsen Uummannap sulluani Saattuniit kingoqisuusoq, Eupopami junimi pissartanngorniunnissami peqataanissamut periarfissaqarluarpoq.

Aataa Saattormiu Karoline Nielsenimut assut maligassiuisuuvoq.

Kalaallit qajaannik taanna qajartortartuuvoq. Karoline Nielsenilu ilaquttani ilagalugit Danmarkimut nuunnermi kingorna qajartorluni timersortalerpoq.

Silkeborgimi peqatigiiffiup ilaasortaaffigisaata qallunaallu inuusuttunut nunanut allanut unammisartuinit malugineqalertorpoq nukittullunilu parrunnermi sukkasartoq. Karoline Nielsen 14-nik ukioqarlunili qallunaat inuusuttuaqqani nunanut allanut unammisartuini toqqarallakkat akornanniittarpoq maannalu periarfissagissaarpoq junimi Europami pissartanngorniunnermi peqataasussatut toqqagaanissaminut toqqarallakkani maanna sukkanermut tulliugami.

- Qaannamik sungiusarnissamut piumassutsimik tuniseqqippoq amerlanerummi tapersersulerpaannga amerlanerusullu malinnaalerlutik, Karoline Nielsen KNR-mut oqarpoq.

Europami pissartanngorniunneq ukiormanna kingusinnerusukkut nunarsuarmi pissartanngorniunnissamut anngunniunneruvoq.

- Neriuppunga Europami pissartanngorniunnermi pikkorinnerit finalerneranni peqataasinnaassallunga misigisimagama siulliit ilaanniissinnaallunga. Aamma misigisimavunga sungiusarnermi malinnaalluarlunga, Karoline Nielsen oqarpoq.

Nuummi inunngorpoq eqqaaneqareersutullu Saattormiunik siuleqarluni. Anaanaa kalaaliusoq ataataalu qallunaajusoq pingasunik ukioqartoq Danmarkimut nuupput.

Qaannamik soqutiginninnera unamminerinnarmik tunngaveqanngilaq.

- Inuttut tunuliaqutinnut tamanna isumalerujussuuvoq. Aataga qajartortartuusoq assut qummut isigisuuara, Karoline Nielsen oqarpoq.

U-18-ni qallunaat nunanut allanut unammisartui tassaapput ineriartortitat taakkunanilu pikkorinnerit siunissami tassaalerumaarput nunarsuarmi kakkannerpaat unammineranni Danmark sinnerlugu unammisartunngorumaarput.

- Aappaagu inersimasuni nunanut allanut unammisartunngorusuppunga. Ingerlaannassaguma OL-mi qaannamik parrunnermi peqataasalerusuppunga, Karoline Nielsen oqarpoq.

Maannali Europami pissartanngorniunnissaq pingaarnertut piareersarfigivaa tassanilu angusarissaarneq U-18-ni VM-qataanermut aqqutaasinnaavoq.