Qaanaarmiut Nunavumiullu imminnut tikeraaqqilerput
Nunavumiut Qaanaarmiullu ukiumoortumik pisartumik paarlaasseqatigiillutik tikeraartarnerat maajimi ingerlanneqaqqissasoq, Peqatigiiffik Nunavut Qaanaaq tusagassiuutinut nalunaaruteqarpoq.
Ukiut 35-t matuma siorna siullermeerlutik taama aaqqissuussinikuupput.
Canadamiut inuit qulit missaat Qaanaamukartarput, assiganillu Qaanaarmiut Canadaliartarlutik.
Tikeraartoqarnermi nereqatigiinneq qittannerlu ingerlanneqartartoq, Peqatigiiffik Nunavut Qaanaami allatsi, David Qujaukitsoq oqaluttuarpoq:
- Aalisariartitsinissarput takorloorparput assigiinngitsunillu silami pinnguaatinik aaqqissuussaqalaarumaarluta. Saniatigut nuannarineqartartorujussuuvoq unnukkut katerisimaarnerit, ataatsimuualaarnerit. Pinnguaatit assigiinngitsut ingerlattarpaat, taamatullu nuannarineqarnerpaasarpoq qittattartorsuuvugut akilinermiut qiteriaasiat najoqqutaralugu. Taakku nuannarineqarnerpaanerusarput. Qittassuaarumaarpugunaasit tikeriarpata, taanna oqarpoq.
Canadamiut timmisartuutileqatigiiffiat attartorlugu angallanneq pisartoq, David Qujaukitsup oqaluttuaraa.
Peqataasussallu 5000 koruunimik timmisartumut akiliuteqartartut, illoqarfimmilu inissaat aaqqissuisunit isumagineqartartoq taassuma oqaluttuaraa.
- Privatimik ikannga Grise Fiordimiit attartoramik akia qaffasilaartumik angalatitsilertugut. Taakunga ikaarniarnermi piumasaqaaterpaaloqartarami, passeqartussaapput aamma isernermut akiliuteqartussaapput, taanna oqarpoq.
Kalaallillu nerisartagai uagut kalaaliminernik taasakkagut Nunavormiut nerisarisarmassik ataatsimoornerminni nerisassaminnik ujartuilereerlutik, David Qujaukitsoq oqaluttuarpoq:
- Ulluni makkunani ajornanngitsuarannguuvoq qaleralinnik pisinissarput, taava arlalinnik qaleralinnik pisinissarput naatsorsuutigivarput. Aavernik uusunik igasariaqassagatta puisip neqaanik pisiniarniarpugut. Ajornanngippallu aamma ajornanngippat tuttunik pisaqartoqarsimassappat tuttunik.
David Qujaukitsoq taama oqarpoq.
