Aatsitassarsiornissamut mittarfiliornissamullu Qaanaarmiut piareerput
Qaanaap qanittuani Moriusap sissaani, aatsitassarsiuleqatigiiffik Dundas Titanium ilmenitimik aatsitassarsiulersaarpoq.
Moriusami Dundas Titanium aatsitassarsiornissaat ukioq kingulleq akuerineqarpoq. Aatsitassarsiornissamut aningaasaliissutit amigarmata aatsitassarsiorneq suli aallartinngilaq. Kingusinnerpaamik 2025-mi decembarip ulluisa 25-iani piginneqatigiiffik aatsitassarsiulersaarpoq.
Tamaakkaluartoq IBA-mik isumaqatigiissummik (Impact Benefit Agreement) taaneqartartumik, aatsitassarsioqatigiiffik, kommuni Namminersorlutillu Oqartussat akunnerminni suleqatigiinissamik isumaqatigiissuteqarput.
Moriusami aatsitassarsiorneq
Dundas Titanium A/S kalaallit piginneqatigiiffigaat allamit aqutaq, ingerlatseqatigiiffimmut piginnittuusoq Bluejay Miningimik ateqarpoq Tuluit Nunaanneerlunilu.
Aatsitassarsiutileqatigiiffik Moriusami 64 kvadratkilometerinik annertussusilimmi piiaasinnaanissamut akuersissuteqarfiuvoq. Moriusaq Qaanaap Savissiviullu akornanniippoq
Ingerlatseqatigiiffik aatsitassanik oqimaatsunik soorlu ilmenitinik titaniumiliornermut atorneqartartunik tassani piiaassaaq. Ukiuni qulini ukioq kaajallallugu piiaassangatinneqarpoq.
Piiaanissamut akuersissut decembarip ulluisa 14-iannit ukiunut 30-nut atuuppoq.
Ingerlatseqatigiiffiup piiaanissaanut matunissaanullu pilersaarut maanna amigaatigaa.
Pilersaarummi tassani aatsitassarsiornerup qanoq ingerlanissaa ilaatigut annikitsortalersorlugu nassuiaatigineqassaaq. Ingerlatseqatigiiffik pilersaarutinik Naalakkersuisunit akuersititsinissamut 2022-mi decembarip ulluisa 31-ata tungaanut periarfissaqarpoq.
Ingerlatseqatigiiffiup aatsitassarsiornermik suliaqarnini kingusinnerpaamik 2025-mi decembarip ulluisa 31-anni aallartissimassavaa.
AAMMA ATUARUK Dundas Titanium: Piniartut unnuisinnaallutillu tunitsisinnaassapput
Isumaqatigiissuteqartut taakku pingasuusut sulisut affai tikillugit kalaaliussasut isumaqatigiissutigaat.
Aatsitassarsiornissami mittarfiliornissamilu kalaallinik sulisoqarsinnaanissaq qilanaarineqarsinnaasoq
Qaanaameersut qulit maskiinalerisutut allagartartaarput. Issittumilu ikiueqqaarnissamut aamma allagartartaarlutik. Avannaata Kommunia tusagassiuutinut taama allappoq.
Aatsitassalerinermik ilinniarfimmi Sisimiuniittumi sapaatit akunneri tallimat pikkorissareerlutik, angutit arfineq-pingasut arnallu marluk Qaanaamut angerlaqqammerput.
- Allagartartaatut qulit Moriusami aatsitassarsiornissami allaallu nunatsinni mittarfiliornissani suleqataanissaminnut piareerput. Ataasiakkaat Ilulissani mittarfiliornermi suliartorsinnaanerminnik takorluuilersimapput.
Mika Oshima Etah, Qaanaami Majoriami ningiuusoq tusagassiuutinut oqarpoq.
- Pikkorissarneq Sisimiuni Aatsitassalerinermik Ilinniarfiup, Dundas Titanium A/S-ip aammalu Qaanaami Majoriap suleqatigiinnerisigut piviusunngortinneqarpoq. Suleqatigiinneq Dundas Titanium A/S-ip Moriusap eqqaani sioqqanit aatsitassarsiorniarnissaanut atatillugu 2018-imi aallartinneqarpoq, Mika Oshima Etah oqarpoq.
Februaarip 22-aniit marsip 29-anut Qaanaarmiut pikkorissarput.
