VIDEO Qaanaami piniartut pisaminnik tunisisinnaanngillat
![](/sites/default/files/styles/image_934x467/public/oembed_thumbnails/2022-12/CJKxd4Cz_9Qehxx-iQtR29pe3xL96R16_AUtLAKXJzc.jpg?itok=f4bZXL_C)
Avanersuarmi qilalukkat nalliusimaaleruttorput, kitaanilu innuttaasut nutaarsuamik mattattugasaqarnissaq qilanaaraat, Qaanamili piniartut pisaminnik tunisisinnaanngillat.
- Upernaaq qaleralinniarnermut tunisineq unitsinneqarmat, juunimi, tassanngaanniit tunitsivimmut Royal Greenlandimut matunikuuvoq, Qaanaami piniartoq Rasmus Avike KNR-imut oqarpoq.
Qaanaami tunitsiviup tunitsivigineqarsinnaannginneranut suna peqqutaanersoq KNR-imiit paasiniaratsigu Royal Greenland-imit nassuerutigineqarpoq tunitsivik 2013-miilli ajuusaarnartumik ingerlasinnaasimanngitsoq, ilanngullugulu akissutigineqarluni qerinasuartitsivik aaqqinniarneqartoq, kisiannili.
- Massakkulli paasivarput atortut umiarsuarmut kingullermut angumersisinnaanngitsut, aatsaalli aappaagu umiarsuarmut tikissinnaasut, Niels Ole Møller Royal Greenland-imi ingerlatsinermut pisortaq allagaqarluni ilaatigut taama akissuteqarpoq, Qaanaamili tunitsiviup ajornartorsiutaa pillugu sukumiinerusumik oqaaseqarumanani. Piniartulli erloqipput.
- Soorunami piniartuugaanni akisoorujussuuvoq, ullut tamaasa qaammatikkaartumik eqqaavimmut, anartarfimmut, kallerup inneranut akiligassat takkussuuttuarput, assut tamanna erloqinartorujussuuvoq taamatut tunitsivissaqarani ingerlarusaarneq, Rasmus Avike oqarpoq.
Qaanaamilu innuttaaqataasut ilungersoqataapput.
- Piniartunut tunitsivissaqannginneq ilaqutaasunut, ingammik meerartalinnut, tassa aningaasarsiutissatsialaagaluarpoq, aasaanerani qilalugaqarluarnerani kisianni mattannik massakkut tunisaqarsinnaanngiivipput ajoraluartumik, Qaanaami innuttaasoq Bebiane Petersen KNR-imut oqarpoq.
Qilalukkallumi ulluni makkunani nalliusimaarluaraluarput.
- Assorujussuaq ajuusaarnarpoq taamatut tunitsivissaqartitaannginnermi ulluni ukunani qilalukkat nalliusimaarfiini assut ajuusaarnarpoq taamatut periarfissaqartitaannginneq, Rasmus Avike oqarpoq.