MIO: Qaanaami nammineq oqaatsit atorlugit ikiorneqarnissaq ujartorneqarpoq
Tamanna MIO-mi meeqqat Illersuisuata Aviaja Egede Lyngep ajornartorsiutitut isigaa. Namminermi oqaatsit kulturillu atorneqarsinnaanissaat inuit pisinnaatitaaffigaat.
- Pingaaginnanngilaq, pisinnaatitaaffiuvoq. Inuttut pisinnaatitaaffiuvoq, aamma meeqqanut. Tassa nammineq kulturerisaq oqaaserisallu nammineq pigisat taakkuupput, aamma aallaavigineqarneranni nikititsilluarnerpaajusinnaasut. Tassa inuk peqataatinneqartutut aamma misigisimagaangami alloriaqqinnissaminut periarfissaqarnerusarpoq, Aviaaja Egede Lynge oqarpoq.
Aviaja Egede Lynge naapertorlugu ajornartorsiut Qaanaami meeqqat angerlarsimaffiup avataanut inissinniarneqarneranni aamma ajornartorsiutaasarpoq. Amerlanertigummi Qaanaaq kulturertillu ungasissumut qimallugit inissinneqartariaqartarput.
AAMMA ATUARUK Qaanaami meeqqat ikiortariaqartut erngertumik ikiorneqarneq ajorput
Kommuuni suliniuteqartoq
Avannaata Kommuniani borgmesterip Palle Jerimiassenip najukkami saaffiginninnerit najukkami oqaatsit atorlugit pisartut oqaatigaa, taamaakkaluartorli soorlu imminut toqunnissamik eqqarsaateqarluni saaffiginninnermi tamatuma ajornartorsiutaanera nassuerutigaa:
- Imminornerup akiorniarneqarneranut tunngatillugu sianertarfiit qitiusoqarfimminngaanniit ingerlanneqarput. Taamaattumik taassuma ajornartorsiutip qitiusoqarfimmik oqaloqatiginnikkut aaqqinniarnissaa ingerlattariaqassavarput, Palle Jerimiassen oqarpoq.
Kitaamiusullu oqalunniarnissaq Qanaarmiut inuusuttortaannut pingaartumik unammillernartuuvoq.
- Aamma uagut namminneerluta iliuuseqarnissarput, tassuunakkut pisariaqarpasippoq. Taanna qanoq aaqqinneqarsinnaanersoq misissussavarput
AAMMA ATUARUK Meeqqat illersuisuat Qaanaalialersoq
Meeqqanut angerlarsimaffik
Avannaata kommuniani ingerlatsivik nutaaq pinaveersaartitsinermik suliaqartussaq, piginnaasanillu tamanik katersiffiusoq pilersinneqarsimasoq tamatumalu saniatigut illoqarfinni tamani siunnersuisoqatigiinnik pilersitsisoqarsimasoq, aamma Qaanaami, Palle Jerimiassenip oqaatigaa.
- Taassuma isumagisussaavaa, ulluinnarni sunngiffimmi kulturikkut pinaveersaartitsinissamullu suliniutit, assigiinngitsut ataatsimoorullugit immikkoortortaqarfimmi ataatsimi ingerlatilissallugit. Taassuma suliniutai assigiinngitsut aallartereerput. Taamaattumik neriulluarfigivara tassuunakkut aamma inuit akuutinneqarnerat suli nukittorsarneqarlunilu peqataatinneqarlutik ingerlanera suli annertunerusumik annertusarneqassasoq, Palle Jerimiassen oqarpoq.
Meeqqat angerlarsimaffiup avataanut inissinneqartarnerat ajornartorsiutaammat, illoqarfimmi meeqqanut angerlarsimaffeqalernissaa aaqqiissutaasinnaasoraa.
- Taannalu suliaq misissorlugu maannakkut aallartipparput. Qaanaami atuartut angerlarsimaffiata, marluinnarnit pingasuniinngikkuni massakkut najugaqarfigineqartup, taassuma allatut atorneqalersinnaaneranut tunngasut misissorlugit aallartipparput. Aammalu taanna suliaq socialstyrelsi ilagalugu suliarineqassaaq. Socialstyrelse suliamut tunngatillugu qaammatip uuma naanerani maanngartussaavoq. Tamakkua aaqqiiviginiarsaralugit qaqittussaassavagut, Palle Jeremiassen oqarpoq.
Qaanaamilu nammineq kajumissutsiminnik suliaqartut meeqqanut inuusuttunullu imminut toqunnissaminnik eqqarsaateqartunut oqaaserisaat atorlugit ikiuisinnaasut pilersinneqaqqammersut, Palle Jerimiassenip ilanngullugu oqaatigaa.