Qaanaami Ittoqqortoormiinilu amaqqut ukioq naallugu piniarneqarsinnaasut

Naalakkersuisut amaqqut pillugit nalunaarut nutaaq ippassaq akueraat.

Taamaalilluni Qaanaami Ittoqqortoormiinilu piniarnermik inuussutissarsiuteqartut ukioq kaajallallugu amaqqunik pisaqarsinnaalerput.

Aqutsiveqarfinnili taakkunani taamaallaat piniagaassapput, nunatta sinnerani eqqissisimatitaallutik.

Amaqqut pillugit nalunaarutip nutaap Qaanaap Ittoqqortoormiillu aqutsiveqarfianni amaqqut piniakkanut neqissaqarniarnermut pingaaruteqartunut akornusiinerisa millisarneqarnissaat pingaarnertut siunertaringaa, Naalakkersuisut tusagassiuutinut nalunaarumminni allapput.

AAMMA ATUARUK Polarulven i Grønland er en bestand for sig

Pisassat amerlassusaat Naalakkersuisut aalajangertassagaat, nalunaarummi allaqqavoq. Pisassat qanoq amerlatigissanersut kingusinnerusukkut nalunaarutigineqassasoq, taakku allapput.

Pinngortitaleriffik: Amaqqut piniarneqartarnerat pillugit sukumiisumik ilisimasaqartoqanngilaq

Pisassiinerit ilisimatuussutsikkut siunnersuinerit Pinngortitaleriffimmeersut eqqarsaatingalugit aalajangerneqartassasut, nalunaarummi allaqqavoq.

AAMMA ATUARUK Amaqqut pillugit ilisimasakippallaarpugut

Pinngortitaleriffiup amaqqut pillugit siunnersuinerani kingullermi 2019-imeersumi ima allassimasoqarpoq:

- Pinngortitaleriffiup innersuussutigerusuppaa amaqqut aatsaat pisarineqartalissasut amerlassusaat sukumiinerusumik ilisimaneqalerpat, nungusaataanngitsumillu piniarneqarsinnaalersimanerat uppernarsarneqarsinnaalerpat.

Amaqqut piniarneqarnerannut inatsit ullumikkumiit atuutilerpoq.