Pinngortitaleriffik: Amaqqut pillugit ilisimasakippallaarpugut
Amaqqut eqqissisimatitaanerisa atorunnaarsinneqarnissaannik Naalakersuisut siunnersuuteqarnerat pillugu pinngortitaleriffimmit taama qisuariaateqarput.
- Kalaallit Nunaanni amaqqut pillugit ilisimasakippallaarpugut, Pinngortitalerifimmi immikkoortortami pisortaq, Fernando Ugarte, oqarpoq.
Avanersuarmi amaqqunik takusaqartoqalersimavoq, tamatumalu kingunerisaanik piniakkat allamut nuunnissaat naalakersuisunit ernumassutigineqarpoq.
AAMMA ATUARUK Amaqqut pillugit isumaqatigiinngitsut
Taamaattumik amaqqut eqqissisimatitaanerannut nalunaarut Naalakkersuisunit atorunnaarsinniarneqarpoq,
inuussutissarsiutigalugu piniartut amaqqunik pisaqarsinnaalersillugit.
Pinngortitaq pillugu nunarsuaq tamakkerlugu suliniaqatigiiffimmit WWF-imit amaqqut eqqissisimatitaanerisa atorunnaarsinniarneqarnera isornartorsiorneqarpoq, amaqqut qanoq amerlatiginerat paasseqqaarlugu piniarneqarsinnaalernissat piumasaralugu.
AAMMA ATUARUK Amaqqut piniagaalernissaat Naalakkersuisut ammaakkusukkaat
Taama oqartoqarneranut Pinngortitaleriffik isumaqataavoq.
- Siunnersuut tuaviuussaavallaarpoq. Piniarnerisigut suna anguneqassanersoq pilersaarusiortoqarsimasariaqaraluarpoq, taavalu arlaatigut nalunaarsuilluni.
Amaqqut ukioq naallugu piniarneqartalerpata tamakkua avanersuarmi nungukkiartulernissaat Pinngortitaleriffiup aarlerigigaa, Fernando Ugarte tikkuaavoq, Naalakkersuisullu kajumissaarlugit siunnersuut eqqarsaatigeqqeqqullugu.
Amaqqut eqqissisimatitaanerannut nalunaarutip atorunnaarsinneqarnissaanut Naalakkersuisut siunnersutaat akuerineqarpat jannuarip aallaqqaataani atuuutilissaaq.