Qaammarsaanerup meeqqat inuusuttuaqqallu kinguaassiutitigut atornerluinermik nalunaaruteqartittassagai
Kalaallit Nunaanni Politiit qaammarsaaneq ”Kinguaassiuutitigut atornerluinerit nalunaarutigikkit – ikiussavatsigit” ullumi saqqummersippaat.
Kinguaassiutitigut naapertuilluanngitsuliornerit qanoq politiinut nalunaarutigineqarsinnaanerat qaammarsaanermi paasititsiniaassutigineqarpoq, taamaalilluni politiinut nalunaarutigineqartartut amerlanerulissapput kinguaassiutitigullu naapertuilluanngitsuliarnerit oqallisigeqquneqanngitsut oqallisigineqalissallutik.
- Kinguaassiutitigut atornerluinerit nalunaarutigineqanngitsut kisitsisaat qaffasinnerungaatsiarsoraarput. Taamaammat ataatsimik oqariartuuteqarluta qaammarsaavugut, tassa kinguaassiutitigut atornerluinerit politiinut nalunaarutiginissaat qanoq pingaartiginersoq innuttaasunut paasitinnissaa, Kalaallit Nunaanni Politiit Pinaveersaartitsinermi sulisuini, politiinspektørip tullersortaa, Viggo Johansen, oqarpoq.
AAMMA ATUARUK Kinguaassiutitigut atornerluinerit: Danmarkimi meeqqat sapaatit-akunneri pingasut iluanni apersorneqartartut
- Tamatuma saniatigut meeqqat kinguaassiutitigut atornerlunneqarnermik nalaataqarnertik namminneq pisuussutiginngisaannaraat paasitissallugu uagutsinnut aamma pingaaruteqarpoq.
- Kalaallit Nunaani kinguaassiuutitigut atornerluisarnerit politiinut nalunaarutigineqartartut Danmarkimut Savalimmiunullu sanilliullugit arfineq pingasoriaammik amerlanerupput.
- Kinguaassiutitigut atornerluinerit 2018-imi nalunaarutigineqartut katillugit 436-upput.
- Kisitsit 2015-imili qaffakkaluttuinnarpoq, 2015-imi nalunaarutigineqartut 295-iupput.
- Kalaallit Nunaanni 2018-imi innuttaasut 1000-iugunik kinguaassiutitigut atornerluinerit nalunaarutigineqartut arfineq-pingasuupput.
Danmarkimi innuttaasut 1000-iugunik nalunaarutigineqartut 1,1-iupput.
Savalimmiuni innuttasut 1000-iugunik nalunaarutigineqartut 1,0-iupput.
- Nunatsinni meeqqanut inuusuttuaqqanullu kinguaassiutitigut atornerluinerit nalunaarutigineqartut Tasiilami amerlanerpaapput.
Kalaallit Nunaanni Politiit Tasiilaq pillugu nalunaarusiamik septembarimi saqqummersitsipput. Nalunaarusiami kisitsisit saqqummersinneqartut uissuumminarput: Tasiilami kinguaassiutitigut pinerluuteqarnerit 191-ip 2014-imit 2018-imut nalunaarutigineqarput.
Niviarsiaqqat qulinit 14-inut ukiullit pingaartumik pinerluffigineqartarsimapput, pinerluttullu angutit 15-init 30-t akornanni ukioqartuunerupput. Pinerluffigineqartoq pinerluffigineqarnermini agguaqatigiissillugu 11-nik ukioqartarpoq.
Taamaammat unnerluutigineqarneq ajortut kisitsisaat qaffasissorujussuusoq, Kalaallit Nunaanni Politiit ilisimatitsissutigaat.
Nalunaarusiamili inerniliinermi kinguaassiutitigut atornerluinerit qanoq nalunaarutiginissaat pillugu ilisimasat nalinginnaasumik amigaataasut aamma oqaatigineqarpoq, taamaammat nalunaarutigineqarneq ajortut amerlanerungaatsiarsinnaapput.
Atuarfeqarfinnukassasut
Qaammarsaaneq nutaaq meeqqanut inuusuttunullu saaffiginnissutaaneruvoq, kisianni aamma isumaginnittut soorlu angajoqqaat, ilaqutariit utoqqaanerusortaat susassaqarfinnilu sulisut meeqqanik nakkutiginninnerunissaannut kinguaassiutitigullu atornerluinermik nalunaarutiginnissamut ikiuinissaannut kaammattuinerulluni.
AAMMA ATUARUK Tasiilami meeqqanut inuusuttunullu kinguaassiutitigut pinerlinnerit pillugit unnerluutiginninnerpassuit
Politiit nunatsinni atuarfinnut tamanut pulaarnissartik pillugu nunatsinni kommunit maanna suleqatigileruttorpaat. Politiit qaammarsaanertik atuartunut isiginnaartissavaat kinguaassiutitigullu atornerluinermik oqallisiginnittoqassalluni:
- Qaammarsaanerup meeqqanit amerlasuunit sapinngisamik takuneqarluni paasineqarnissaa pingaaruteqarpoq. Taamaammat qaammarsaaneq nunatsinni sumiorpaluussutsinut pingasunut oqaatsinullu nutserneqarpoq. Kinguaassiutitigut atornerluinerup nalunaarutiginissaa uagutsinnut qanoq pingaartiginera pillugu atuartut oqaloqatigissavagut, Viggo Johansen oqarpoq.
- Meeqqat ikiorusuppagut, taamaaliussaguttali meeqqat uagutsinnukarlutik kinguaassiutitigut atornerluinermik nalunaarutiginninnissaat pisariaqarpoq.
