Puto Kivioq Ivan Dumanovillu Nuummi Qinngorpumi angerlarsimaffimminni.Assi: KNR

Puto Kiviup aappaa sorsunnermi toqutaavoq: Kingullermik oqaaserisaasa nukissaqartippaanga

Puto Kiviup aappaa, Ivan Dumanov Ukrainemeersoq sorsunnermi sapaatip akunnerata siuliani toqutaavoq. Putop qullii kuugaarput, naalli aappani toqoreeraluartoq taassuma nukissaqartippaani.

Ivan Dumanovip Kyivimeersup angajoqqaani isumannaatsumiitsilerniarlugit Nuummit eqqissisimaffiusumit Ukrainemut qaartartumeeriffiusumut aallarpoq. Taassuma arnaa angutaalu Ruslandip præsidentiata Putinip qaartartumeerineranit ungasissumi toqqissillutik maanna Canadamiipput.

Ivan Dumanovili akornatsinniikkunnaarpoq. Taanna naleqarnerpaamik akiliivoq, tassami 30-nik ukioqaannarluni sorsuffimmiinnermini maajip ulluisa sisamaanni toquvoq.

Nuummi aappanilu angerlarsimaffianni aappaa, 28-nik ukiulik Puto Kivioq Qaanaameersoq ippoq.

AAMMA ATUARUK Ivan Ukrainimeersoq angerlapallakkusuttoq: Anaanaga ataatalu isumannaatsumukassapput

Taassuma inuunera maajip ulluisa arfernanni allanngorluinnarpoq.

- Ullut marluk tusagaqarfiginngereerlugu, sivitsorpallaarmat tusagaqarfiginagu angajoqqaavi allaffigisariaqarnikuuakka arlaannik tusarsimaneraat, aamma sivitsorujussuarami tusannginnera. Tallimanngornermi tusarpara toqusimasoq. Angajoqqaavi allaffigereerlugit skypekkut sianerput nalunaarfiginiarlunga susoqarneranik taavalu paasititsiniarlutik qanorpiaq pisoqarsimanersoq, Puto Kivioq tusaaneqarpiarsinnaanngitsumik nipeqarluni oqarpoq.

Sekundialuit soqanngitsumut isigeriarluni qullini kuuttut nangippoq:

- Oqarput nuanninngitsumik tusartitassaqarlutik, aamma takusinnaareerakku susoqartoq, sianertut kiinarlukkamik assut, taavalu aliasullutik qiallutik, aamma paasisinnaavakka taamak isikkoqarsimammata. Isumaqarsimagaluaramik sianerfigineqarsimasungaluunniit arlaannit. Taamaammat sianersimanngitsut sivisuumik. Aatsaat uanga tallimanngornermi tusarakku, sunaaffa sisamanngornermi tusareersimagaat toqusimasoq. Tutsaqarnissara utaqqiinnarsimagamikku. Susoqartoq uanga nalullugu, aamma taakkua nalusimagamikku tutsaqarfigineqarsimanersungaluunniit, Puto Kivioq oqarpoq.

AAMMA ATUARUK Puto Kiviup asasaa Ukrainemut aallarpoq: Suli uumanersoq eqqarsaatigiuaannarpara

Ivan Dumanov nunatsinni qimaasuni siullersaalluni nunatsinnut 2019-imi tikippoq. Taanna russit præsidentiata Putinip Krimip qeqertaasaanik 2014-imi tiguaanermini qaartartumeerineranit qimaasuuvoq. Ivan Dumanov angummit taassuminnga sakkutuulersortoqarnerani allami maanna toqutaavoq.

Puto Kiviup aapparmi qanoq toqusimanera annikitsortalerlugu oqaluttuarinngilaa, sorsunnermili inuunini annaagaa uppernarsarpaa.

- Angajoqqaavisa oqaatigaat ajutoornermikkut toqutaasimasoq, kisianni oqaatigisinnaanngilara qanorpiaq toqutaasimanersoq, aamma nalunngilara inuttaata oqaatigissagiga kissaatiginngikkaa, Puto Kivioq Ivan Dumanov pillugu oqarpoq.

- Ivan aallanngikkallarami oqaaqqissaarfineqartuaannaavinnikuugama qanorluunniit pisoqaraluarpat inuuneq ingerlaqqittussaasoq. Oqaaqqissaassutigisarnikuummagu taamaammat taakku nukittorsaatigingaatsiarpakka oqaaqqissaarutiginikuusai. Qujanartumik ilaquttakka ilagillattaarpakka, kisianni inuk immineerusuttuugama misigissutsikka toqqortorusunnagit ippassaq ulloq tamaat kisimiippunga. Nammineerniassagama. Taamaammat nukissaqarnerusutut misigigaluarlunga, kisianni aliasuppunga, Puto Kivioq oqarpoq.

                                                                                                             Assi: Ivan Dumanov/Puto Kivioq

Ivan Dumanovip umiatsiarneq nuannarisaraa. Nammineerluni umiatsiaaraqarpoq aalisagarpassuarnillu pisaqarnikuulluni.

Angerlaqqissanngitsoq

Ivan Dumanov maajip ulluisa sisamaanni toquvoq, ullaarlu oqaluffimmi eqqaaniarneqarpoq. Ilisinermik taaneqarani oqaluffimmi naalagiartitsineruvoq.

Ivan Dumanovip ilerrata nunatsinnukaannissaanut aamma pilersaaruteqartoqanngilaq.

- Ima pisoqassagaluarpat taava qanoq pisoqassanersoq eqqartornikuunngilarput. Aamma massakkut Ukrainemi inissisimaneq, taama inissisimatillugu ajornakusoortorujussuuvoq qanoq pisoqarsinnaaneranik naatsorsuinissaq imaluunniit pilersaarusiornissaq, aappaa oqarpoq.

Ajornerpaamik pisoqarsinnaanera pivoq, taamalu pisoqarnissaanut Puto Kivioq qanoq piareersimatiginerluni eqqarsaatigilluaqqissaartuaannarpaa.

- Ivanip aallannginnerani eqqartornikuuvarput qanoq pisoqarsinnaanera aamma nukittorsangaatsiarnikuuvaanga oqaaqqissaallunga arlaannaannilluunniit nukittuffeqartariaqartunga. Aamma inuttaata oqaatiginikuuvaa nuannaaruma nuannaaqataassasoq. Sunilluunniit tapersersortarnikuugaminga assut, taamaammat uanga nuannarisannik aallussiguma nuannaaqataassasoq, Puto Kivioq oqarpoq.

Oqaloqatigiinnermi unikkallalaarneq sivisoorujussuarmik misiginarpoq. Iggiarissariarlunilu nangippoq:

- Qiasunga nuannarisarnikuunngilaa, qiagaangama tuppallersartarnikuuvaanga. Taamaammat ulluni kingullerni eqqarsaatigivara nalunavianngikkaa sooq qianersunga. Annaasarpummi taama annertutigisoq, taamaammat paasisinnaasimassavaa sooq qianersunga, kisiannili nukittorsaatigingaatsiarakku aallannginneraniilli oqaaqqissaanneqartarnikka nukittorsaatigingaatsiarlugit assorujussuaq. Taamaammat massakkut ima pisoqarnerani naammagittarlunga Ivanip nunarsuarmioqataannginnerani inooqataassaanga. Naammagittarlunga.

Foto: Bibi Nathansen/KNR

Ivan Dumanovip toqunerata nalunaarutigineqarnerata aaqaguani Kommuneqarfik Sermersuup suleqatertik toqusoq pillugu qiteqqusimavoq. Ivan Dumanovimi kommunip aningaasaqarnermut immikkoortortaqarfiani suligaluarpoq.

- Erfalasuliisoqarmat takusinnaavara inuttaa qanoq Kalaallit Nunaannut isumaqangaatsiarsimanera, takussutissatut isigivara. Aamma qujarujorujussuarpunga taamak takutitsisinnaammata, aamma tuppallernarpoq, Puto Kivioq erfalasumik qiteqqusimaneq pillugu oqarpoq.

Naak Ivan Dumanov Ukrainemi 1991-imi inunngorsimagaluarluni taassuma nunarput angerlarsimaffigaa.

- Inuttaa angerlarsernikuuvoq. Angerlarnissani qilanaarinikuuvaa, kisiannilu ingerlaannaq angerlariaannaanani. Paasisinnaavara tassuunartaatigut Kalaallit Nunaat inuttaanut qanoq isumaqarnikuutigisoq. Aamma nammineq oqaatiginikuuvaa Ukrainemut angerlarnikuugaluarluni, kisianni Kalaallit Nunaat angerlarsimaffigilersimallugu, Puto Kivioq oqarpoq.

Oqaasii kingulliit

Aappariit Ivan Dumanovip toqunissaanut ulloq ataaseq sioqqullugu kingullermik oqaloqatigiipput.

- Nammineq neriuutigigaa qanittumi angerlassalluni. Nammineq aamma oqaatigisarnikuuvaa tamatigungajak angerlarsinnaasuuguni massakkut angerlassagaluarluni. Aamma pilersaarutigigaluaratsigu sorsunneq unippat ilaqutai alakkartariaqarlugit, kisianni inuuneq nalunarmat taanna angunngitsoorparput.

Aapparmi asasami annaanera piffissap uninnganeratut nunarsuarlu nammineq ilaanani ingerlaarneratut misigisimanarsinnaavoq.

- Nalura sussanerlunga, kisianni inuunera ingerlateqqittariaqarlugu misigisimavunga, aamma akuerivara taamak pisoqartoq, kisianni soorunami aliasuutigigaluarlugu ingerlaqqittariaqartunga. Taamak oqaaqqissaartarnikuummanga peqqussutai malillugit inuuneq ingerlateqqissavara. Uanga aamma nammineq inuuneq pigerusukkakku, taamaammat inuuneq ingerlateqqissavara. Nalunnginngakku qaquguluunniit pilluarneq nassaareqqikkumaarlugu, Puto Kivioq nukittulluni sapiissuseqarlunilu oqarpoq.

KNR-ip Ivan Dumanov Ukrainemut aallannginnerani marsimi oqaloqatigaa. Sorsunnermut ilanngussinnaassanersoq aperineqarami angaavoq. Soorli sorsukkusunnersoq KNR-imit aperineqarpoq. Taannalu aalajangersimasuik ima akissuteqarpoq:

- Sooruna? Illit, ilaquttatit ikinngutitillu toqunniarneqarussi, taava qanoq iliussavit? Apeqqummut akissut ersarereerpoq, taamaammat kikkut tamarmik paasisinnaassagaat ilimagaara, Ivan Dumanov taamani oqarpoq.

Ivan Dumanov sorsunnermi toqutaasorpassuit maanna ilagilerpaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl