Putin præsidentimut qinersinermi ilimagineqareersutut ajugaarujussuartoq
Ruslandip præsidentia Vladimir Putin ilimagineqareersutut nunami tassani præsidentimut sapaatit akunnerata naanerani qinersinermi ajugaarujussuarpoq.
Putinip pissaaneqarnini taamaasilluni sakkortuseriaannarpaa, ukiunilu tulliuttuni arfinilinni præsidentioqqissalluni.
Putin qinersinermi pingasunik unammillerteqarpoq.
Ruslandimi præsidentimut qinersinermi Putinimut illuatungiliuttunik qinersisoqarsinnaasimanngilaq, soorlu aamma Ukrainemut sorsunnermik akerliusunik qinersisoqarsinnaasimanngitsoq.
Putin 71-inik maanna ukiulik Ruslandimi præsidentitut tallimassaa maanna qinigaavoq. Taanna nunarsuarmi nunat angissutsimikkut anginersaanni 1999-imili præsidentiusimanngikkuni ministeriunerusimavoq.
Putinip præsidentitut qinigaaqqinnermigut Sovjetunioniusimasumi qullersamut Josef Stalinimut naleqqiullugu Ruslandimi naalakkersuinikkut qullersatut sivisunerpaamik issiasinnaassaaq, præsidentitummi 2030-p tungaanut maanna issiasinnaassaaq. Ruslandimi ukiuni 200-ni qullersatut aatsaat taama sivisutigisumik taava issiasoqarsimassaaq.
Ruslandimi præsidentimut qinersineq killilersugaanngitsumik aaqqissuunneqaranilu naapertuilluanngitsumik aaqqissuunneqartoq, Ruslandimi illuatungiliuttut nunallu killiit isumaqarput.