Ruslandimi qinersivinni qaartartumeerisoqarlunilu ikuallatitsisoqartoq

Russit oqartussaasuisa nalunaarutigaat, Ukrainep ilaani russit tiguagaanni aamma Skt. Pertersborgimi qinersivinni qaartartut benzinamik imallit qaartinneqarsimasut.

Ukrainep ilaani russit tiguagaanni qaartartumeerisoqarpoq tallimanngornermi, præsidentimut qinersinerup ulluani siullermi. Ruslandimi præsidentimut qinersineq ullunik pingasunik sivisussuseqarpoq.

Ruslandimi illuatungiliuttut nunallu killiit oqarnerat naapertorlugu, præsidentimut qinersineq naapertuilluanngitsutut tamallu oqartussaaqataanerat naapertorlugu qinersinerunngitsoq.

Putinimut Ukrainemilu sorsunnermut akerliusut præsidentinngorniunnermut qinigassanngortissinnaanngillat.

Skt. Petersborgimi qinersinermi oqartussaasut paasissutissiissutigaat, arnaq puijaasamik ikuallajasumik immikkamik qinersivimmut igeriussisimasoq .

Arnaq taana 25-it missaanik ukiortoq nutaarsiassaqartitsivik ritzau taama allaaserisaqarpoq

- Unioqqutitsilluni iliuuseqartoq politiinit piaartumik unitsinneqarpoq. Ajoqusertoqanngilaq, oqartussaasut nalunaaruteqartarfimmi Telegramimi taama allapput.

Ukraenip  kujasinnerusortaani Skadoskimi russit tiguarsimasaanni qinersivimmi qaartartoq qaartinneqarmat ajoqusertoqanngilaq.

Moskvami qinersivinnilu allani aseruatiterisoqarsimaneranik nalunaaruteqartoqartarpoq.

Moskvami qinersivik arnamit ikuallatsinneqarsimavoq.

Ikuallatsitsineq videukkut nakkutilliivimmi takuneqarsinnaasimavoq.

Qinersivik ikuallatsitsinermit pujuinnanngorsimavoq, taamaalineranilu arnap allap qinersinermut nakkartitsivimmut qalipaammik qorsummik qalipaatilimmik kueraasimavoq.

Ruslandimi qinersiviit nakkartitsiviinut qalipaatinik kueraasimasut qulingiluat tigusarineqarput.

Akerliussutsimik takutitsisoqarpoq,naak taakkua sakkortuumik pillarneqarnissaannik russit kisermaassillutik aqutsisut aarlerisaareeraluartut.