Pullattagarujussuaq silaannakkut ingerlaartoq innuttaasunit eqqumiigineqarluni politiinut nalunaarutigineqartoq

Ilulissani Nuummilu innuttaasut suuneranik paasiuminaatsumik silaannakkut ingerlaartumik takusaqartarlutik politiinut nalunaaruteqartarsimapput.

Taakkuami qaqortumik ammalortumik silaannakkut ingerlaartumik takusaqarsimapput.

Kalaallit Nunaanni politiit taama paasissutissiipput, taakkuami Nuummi Ilulissanilu innuttaasunit saaffigineqarput suuneranik paasiuminaatsumik silaannakkut ingerlaartumik takusaqarsimanertik pillugu

Taannaligooq ulorianngilaq eqqumiigisassaananilu.

Pineqartoq tassaavoq amerikamiut avataarsuarliartitsisarfiata NASA-p silasiornermi atortua pullattagarujussuaq.

Pullattagarujussuaq 970.000 kubikmeterisut angitigivoq. Containerit 20 fodsitut angissuteqartut 29.400it amerlatigisutut angissuseqarluni.   Taassuma ataaniippoq seqerngup qinngornerinik uuttuut, taannalu seqerngup qinngornerinik uuttuutit annersaat siullermeerlugu silaannarmut aallartinneqartoq.

Seqerngup qinngornerinik misissuisarfik Sverigip avannaanniippoq. Pullattagarujussuaq 3.500 kg sinnerlugu oqimaatsigisoq kranimi nivingasoq takuneqarsinnaavoq Assi © : Swedish Space Corporation

Pullattagarujussuaq taanna Svenskit  avataarsualiartitsisarfiannit Esrange Space Centerimit Sverigep avannaanniittumit ullut pingasut qaangiummata  silaannarmut aallartinneqarpoq.

Pullattagarujussua taanna kimmut ingerlaarpoq, siullermik Island qulaappa kingornalu tassa Kalaallit Nunaat qulaallugu.

Pullattagarujussuaq 37.000 meterisut qutsitsigisumi ingerlaarpoq, ingerlaarneranilu illoqarfinni assigiinngitsuni takuneqartarsimalluni.

Pullattagarujussuup ingerlaarfia uani her malinnaaffigineqarsinnavoq.

Silasiornermi atortup pullattakkap ingerlaarfia uani takuneqarsinnaavoq. Taanna Sverigemit pingasunngormat silaannarsuarmukartinneqarpoq. Assi © : NASA