Pujortarunnaarsitsiniarnermi assit maajunnartut

Naalakkersuisulli piumagunik sikaritsit puuini pujortarnaveersaarnissamut  kaammattuutit sakkortunerulersissinnaavaat.

Sikaritsimmi puuini assilissat maajunnartut februaarip 15-ianni Danmarkimi takuneqarsinnaanngussapput, assillu unnia pujortarunnaarusulersitsisartut.
Assitaliussat ilaani puak peqqissoq aappalualaartoq takuneqarsinnaavoq; massa saniani puak qernariinnaq, pujortartartup puaa, ilisarnarsereerluni takussaasaqqaartoq.

Assit maajunnartut nunarpassuarni allani atugaapput, assillu maajunnartut piumagaanni saqqummerneqarsinnaanerat, EU-p qangali akuerereersimammagit, assit Danmarkimi aamma saqqummersinneqartalernissaat maanna naalakkersuisuusut siuliisa akuerisimavaat.
Nunatsinnili assit maajunnartut aamma atuutsinneqalissanersut suli aalajangiiffigineqanngilaq.

- Assit maani aamma takutinneqartalissanersut Naalakkersuisut aalajangigassaraat, Peqqinnissamut Naalakkersuisoqarfimmi pisortap tullia Julie Præst Wilche oqarpoq.

Tassa assit maajunnartut 14-it EU-p piumasunut tamanut atugassiarititai, Danmarkimilu tupanik tunisassiortut pinngitsaaliissummik takutitassaat, nunatsinni pujortartartut suli takusariaqanngikkallarpaat.