Puisit amiisa tunisaalluarnerat Great Greenlandip nuannaarutigaa
Puisit amiinik tunisassiorneq maanna iluatsilersutut isikkoqarpoq. Taakkumi piumaneqaleraluttuinnartut amernik tuniniaaviup, Kopenhagen Furip, oqaatigaa. Tassanimi puisit amii katillugit 21.485-it sisamanngormat Københavnimi akitsorterunneqarput.
- Puisit amii soqutigineqaraluttuinnartut takuarput, tamannalu assut nuannaarutigaarput, Great Greenlandimi pisortaq Lars Berg Sørensen KNR-imut oqarpoq, nangillunilu:
- Akitsorterussinerni niuerfimmut uteqqissimavugut. Soqutigineqaraluttuinnartoq malugaarput pisisartullu amerliartuinnarnerat takusinnaavarput. Tamannalu pitsaalluinnartutut isigaarput,
Pisortaq Lars Berg Sørensen oqarpoq.
Aamma atuaruk Kukkunersiuisut: Nalunaarut mianersortumik tiguneqartariaqarpoq
Kopenhagen Furip Puisit amiinik nittarsaassineq annertuumik sulissutigisimavaa. Ukiullu ataatsip ingerlanerinnaani Great Grenlaandi suleqatigereerlugu, atisanik ilusilersuisartut pisisartullu arlallit puisit amii eqqumaffiginerulersimavaat.
Kaammattuisullu arlallit pisortap aamma qujamasuutigai. Assersuutigalugit Inuit Sila assiliineq atorlugu 'Sælfiemik' nittartakkakkut inuppassuarnik iliuuseqartitsimmata aamma atisaliortartut atisanillu ilusilersuisartut, soorlu Bibi Chemnitz, puisit amiinik tunisassiorneq ingerlallualerneranut pisooqataanngitsoornavianngitsut oqaatigalugu.
Aamma atuaruk Puisit amii misunneqanngitsut soqutigineqaleraluttuinnartut
- Ukiuni arlalinni killormut ingerlareerluta, sivisoorujussuarmillu erloqereerluta, kiisami niuernerput patajaalliartulerpoq. Kopenhagen Fur sinnerlugu maanngaanniit oqaatigerusuppara tamanna assut isumalluarnartuusoq, pisisartummi arlallit saqqummeralermata.
- Siunissaq isumalluarnartuusoq upperaarput, neriuppungalu akinik qaffaasinnaajumaarluta, Lars Berg Sørensen oqarpoq.
Great Greenlandip atisaliortartoq qallunaaq ilisimaneqarluartoq, Jesper Høvring, suleqatigalugu puisit amiinik atisanik nutaanik ilusilersuipput.
Høvringip ilusilersugai Københavnimi Bella Centerimi atisanik takutitsinermi, Copenhagen Fashion Weekimi, januarip 28-anni siullerpaamik saqqummiunneqassapput.
