Puisit amii misunneqanngitsut soqutigineqaleraluttuinnartut

Great Greenlandip pisortaa Lars Berg Sørensen naapertorlugu ammit 8.867-it tunisaasimapput.

Isertuunneqassanngilaq puisit amiinik tuniniaaneq uatsinnut unammillernartuummat, aamma naggueqatigiit inuit immikkut akuerisaanerata  nassuiaatiginissaa tamaviaarutigisariaqartaratsigu. Tuniniaanerli sioqqullugu tuniniaanermilu ammit soqutigineqartorujussuusimapput, tamanna ajunngittumik ingerlaneranut takutitsissutaavoq. Pisisartut isitik puisit amiinut  ammariartuaarpaat, maannalu ilisimalerlugu taamaallaat Kopenhagen Furimi tamakkusisinnaallutik, Lars Berg ilanngullugu oqarpoq.

Akitsorterussinerup ersersippaa puisit amii misunneqanngitsut soqutigineqaleraluttuinnartut, apriilimilu akitsorterussinernut naleqqiullugu pisisartut amerlingaluttuinnartut.

Kopenhagen Fur-imi akitsorterussisoq Kasper Scott Reinbacher oqarpoq pisisartut ammit misunneqanngitsut assut soqutigisimangaat. Soqutiginninnerup takutippaa atuisartoqartoq tuniniaavigineqarsinnaasunik, tamannali misissuiffigineqartariaqartoq.

- Puisit amiinilli misutanik pisisartunut nittarsaassinerput suliarigiigarput ingerlatiinnassavarput, tamakkumi kamippannut, pooqattanut allanullu atornissaat naleqquteqaat. Nutaarsiassaq nuannersoq tassunga tunngasoq tassaavoq, akitsorterussinerni pisisartut misutat soqutigisorujussuungaat. Tassaniippoq niuverfissaq ersarissoq, Kasper Scott Reinmacher oqarpoq.

Taama illuaqqajaaneq apriilimiit ingerlaannarpoq, pisisartut maanna aataat amii natsiit amiinut naleqqiullugit soqutigineruaat, meqquisa naannerunerat pissutigalugu. Aataat amii pitsaanerit agguaqatigiisillugu 333 koruuneqarput, akisunerpaat 700 koruunilerneqarlutik. Natsiit amii pitsaanerit marloriarlugit akitsorterussiffigineqaramik agguaqatigiisillugu 243 aamma 276 koruuneqarput.

Ilanngullugu oqaatigisinnaavarput Great Greenland Qaqortumi ippassaq ataasingornermi ataatsimeersuarmat.