Puigortunngorsimasunut inissat amigaataapput

Kommuneqarfik Sermersuumilu Isumaginninnermut Suliffeqarnermullu Ataatsimiititaliami ilaasortap Randi Vestergaard Evaldsenip qanoq iliortoqarsinnaaneranik kommunimut misissoqquaa.

- Puigortut ukiut ingerlanerini amerliartuinnaartussaasut takusinnaavarput. Tamanna ajuusaarneraluarpoq kisianni naleqqussarneqartariaqarpoq, Randi Vestergaard Evaldsen oqarpoq.

Puigortunngortut sullinneqartut Nuummi nalunaarsorneqarsimasut maanna 40-uupput, taakkunanngalu 30-t inissamik pisariaqartitsillutik.

Taamaattoqaraluartorlu puigortunngortut inissaqartikkitik Isumaginninnermut Suliffeqarnermullu pisortaagallartup Kista Lynge Høeghip oqaatigaa.

- Inissaqarput kisianni tulluarnerusumik avatangiiseqarnissaat uani pineqarpoq taavalu amerliartormata nutaamik ilusilersukkamik avatangiiseqarnissaat pisariaqartinneqarnerat tikkuartuutigineqarluni uani suliami, Kista Lynge Høegh oqarpoq.

Randi: Aningaasaliiffigisariaqarpoq

Kommuneqarfimminngaanniillu assigiinngitsunik siunnersuuteqarput.

- Nutaamik angerlarsimaffiliortoqarsiinnaavoq immikkut puiortunngortunut sullissinissamut tulluarsakkamik. Imaluunniit pioreersut nutaamik aaqqissuuteqqillugit suliarisinnaavagut taamaalillugu puiortunngortunut inissat amerlisinnaallutigit, Kista Lynge Høegh oqarpoq.

Taamaaliorniarnerli aningaasanik naleqarpoq, kommunillu naatsorsuinera aallaavigalugu 55 millionit koruunit pisariaqartinneqarput. Tamannali aporfiussanngitsoq Randi Vestergaard Evaldsenip oqaatigaa.

- Puigortunngorneq nammineq pisuussutaannginnami nappaataallunili. Taamaammat aningaasat nassaarineqartariaqarput aamma pingaaruteqarput nassaarinissaat uani sinaakkutissaq aaqqivigissagutsigit aamma toqqissisimanissaq puiortutut ilaqutaasutullu pingaaruteqarluinnarami.