Professorip sinneqartoorneq nuannaarutigaa
- Soorunami sinneqartoorneq nuannaarutissaavoq. Taamaattoqarnerani aningaasaqarniarnikkut ajornakusoortoqalernavianngilaq, matussusiiniarlunilu ulapittoqartariaqarnani, Aningaasaqarnermut Siunnersuisoqatigiit siulittaasuat, aningaasaqarnermullu professori, Torben M. Andersen oqarpoq.
Pissutsilli Namminersorlutik Oqartussanit aqunneqarsinnaanngitsut patsisaanerullutik aningaasanut inatsimmi naatsoruutigisatut amigartooruteqarnani sinneqartoortoqarsimasoq, professorip oqaatigaa.
Aamma atuaruk Nunatta karsia tupaallannartumik sinneqartooruteqarujussuarpoq
- Sinneqartooruteqarnissamut amigartooruteqarnissamulluunniit aalajangiisuunerpaat nammineq aqunneqarsinnaajuaannanngillat, Torben M. Andersen oqarpoq.
Aalisakkanut akit qaffasinnerat Torben M. Andersenip tikkuarpaa.
Tamatumalu saniatigut Nuummi pineqaatissinneqarsimasunik inissiisarfimmik talittarfimmillu sanaartortitsinernermi akileraarutitu akitsuutillu Nunatta karsiata pingaartumik isertitsissutigivaa.
Aningaasaqarnerlu ataavartumik pitsanngorsarneqassappat inuussutissarsiornerup ineriartortinneratigut suliffissanik amerlanernik pilersitsisoqartariaqarpoq.
Taamaasiornikkummi Nunatta karsia isertitaqarnerulissaaq, Andersen oqarpoq.
Aamma atuaruk Aningaasarsiornikkut imminut napatilernissaq inornartoq
- Aningaasarsiornikkut imminut napatissinnaalernertut alloriarnertut sinneqartoorneq taaneqarsinnaanngikkallarpoq, Torben M. Andersen oqarpoq.
Namminersorlutik Oqartussalli aningaasaqarnikkut aqutsillaqqinnerulersimanerat sinneqartooruteqarnermut patsisaaqataasoq, aningaasaqarnermut naalakkersuisup, Randi Vestergaard Evaldsenip sisamanngormat oqaatigaa.
Torben M Andersenillu tamanna isumaqatigaa.
- Kisianni nunap aningaasaqarniarnerata naliginnaasumik aqunneqarnera soorunami isiginiarneqassaaq, taannaagamimi sinneqartoornissamut ajornarunnaarsisitsisartoq, Aningaasaqarnermut Siunnersuisoqatigiit siulittaasuat, Torben M. Andersen oqarpoq.
Aamma atuaruk Naalakkersuisoq: Inuussutissarsiutinik ingerlatallit pitsaanerpaanik atugassaqartikkusuppagut
Aamma atuaruk Aningaasanut inatsisip isornartorsiorneqarneranut Demokraatit isumaqataapput
