Nunatta karsia tupaallannartumik sinneqartooruteqarujussuarpoq

Nunatta Karsiata 2015-imut naatsorsuutai naammassillugit kukkunersiorneqareerput. Kukkunersiuinerullu inernerata takutippaa missingersuutaasunit nikingasut amerlasut. Nunatta karsiami 137 millionit koruuninik sinneqartoorsimasoq, Namminersorlutik Oqartussat tusagassiuutinut nalunaarutigaat.

Allattoq Thomas Munk Veirum, Ivik Kristiansen

maajip 19-at 2016 16:14

Ingerlatsinermi sanaartornermilu 137 millionit koruuninik sinneqartooruteqartoq naatsorsuutit takutippaat. Tamannalu missingersuutaasunit allaanerujussuuvoq. Ilassutitummi aningaasaliisutit 73 millionit koruunit ilanngullugit missingersuutigineqarpoq. Missingersuutigineqaraluartumiillu nikingassut taamaasilluni 210 millionit koruuniuvoq.

Tusagassiuutinut nalunnarut naapertorlugu sinneqartoorneq arlalinnik patsiseqarpoq.

- 2015-imi aalisarnermi akigissaartitsineq toqqammaviit annerpaat ilagaat. Tassunga ilanngullugu minnerunngitsumik qaleralinnut raajanullu akitsuutitigut isertitat amerlanerusut. Tulliullugulu sanaartornermi aningaasaliissutit annertuut, soorlu isertitsivissaq Nuummilu umiarsualivissaq Nunatta Karsianut suliffeqarfiit maanngaanneersut akileraarutinut akitsuutinullu akiliuteqarnerunerisigut isaatitsineruffiupput, tusagassiuutinut nalunaarummi allaqqavoq.

Aningaasaqarnermut naalakkersuisup, Randi Vestergaard Evaldsenip sinneqartoorneq nuaannaarutigigaluarlugu Nunatta aningaasaqarniarnerani suli unammillernartoqartoq erseqqissaatigaa.

Aamma atuaruk Danskit aningaasaqarnermut ministeriat nersualaarivoq

- Ilisimaneqartutut aalisagaatitta akii nikerartupilussuupput. Masakkut qujanartumik qaffasipput, tassanngaannarli apparsinnaapput, taamaattoqarneranilu Nunatta Karsiata aalisakkanit isertitai appassapput. Randi Vestergaard Evaldsen oqarpoq.

Namminersorlutik Oqartussat kukkunersiuisuisa Deloittep, Nunatta Karsiata naatsorsuutai sillimmartaarutitaqanngitsunik oqaaseqarfigai.

Aningaasaqarnermut naalakkersuisoq Randi Vestergaard Evaldsen arfinermut radioaviisimi toqqaannartumik apersorneqarumaarpoq.

Nutaarsiassami kukkunermik nassaarsimaguit uunga allaffigineqarsinnaavugut.