Prins Nikolaip aanami taaguutinik peersitsinera paasisinnaanngikkaa

23-nik ukiullip, prins Nikolaip qatanngutinilu prinsitut prinsessetullu taaguuteqarunnaarsinneqarnissaminnut aalajangiineq aliasuutigalugu pakatsissutigaa.

Tamanna Ekstra Bladetimut oqaatigaa.

- Ilaqutakkalu tamatta aliasungaatsiarpugut. Uagut, angajoqqaakkalu aalajangerneq tamanna qanorlu sukkatiginera tupaatigivarput.

- Sooq taamaattoqarnera paasiuminaatsittorujussuuara.

Ekstra Bladetip prins Nikalaip angutaa prins Joachim Parisimi sisamanngornermi naapippaa.

Taassuma ”meeqqami taama ajortumeerneqarnerisa takunissaat” nuanninngisaannartoq oqaatigaa. Taakku inissisimaffitsit paasisinnaanngikkaat oqarpoq.

Itisileerusunngitsoq

Prins Joachim apersorneqarnermini attorsimarpasippoq, taannalu pisoq anaanaminut, dronning Margrethemut atassuteqarneranut qanoq sunniuteqarnersoq aperineqarami sivisuumik nipeqanngeriarluni ima akivoq:

- Itisilertariaqanngikkiga isumaqarpunga.

AAMMA ATUARUK Prins Joachim: Meeqqakka 25-liigunik prinsetut prinsessetullu taaguutaat atorunnaartussaagaluarput

Prins Nikolai angummisulli pisoq attorteqqassutigitigineraa aperineqarami 23-nik ukiulik prins ima akivoq:

- Aap. Tamatta attorteqqavugut. Immiussaq takunngilara kisianni atuarlugulu tusarpara, taamaammat aap.

Akerleriissuteqarneq aanaminut atassuteqarneranut qanoq kinguneqassanersoq aperineqarami ataatami akissuteqarneranut assingunerarpaa, Ekstra Bladet allappoq.

Nicolai taaguutiminik arsaarneqarnerata saniatigut qatanngutai Felix 20-nik ukiulik, Henrik 13-nik ukiulik aamma Athena qulinik ukiulik aamma ilaapput.

Angajulliit marluk prins Joachimip grevinde Alexandrallu meeraraat – nukarliillu marluk prinsesse Marielu meeraraat.

Attortinnera maanna sakkortunerusoq

Prins Nikolai-ip taaguutini ukiortaamiit atorunnaassasoq tusaramiulli sapaatip akunneraanngilarluunniit.

Tamannali maanna tamanut saqqummiunneqareermat attortinnera sakkortunerusoq, taanna oqarpoq.

Kunngikkormiut prins Joachimip meeraasa sisamat ukiortaamit imminnut prinsitut prinsessetullu taagorunnaarnissaat pillugu pingasunngornermi saqqummiussipput.

AAMMA ATUARUK Prins Joachimip meeraasa prinsessetut prinsitullu taaguutitik annaagaat

Prins Joachimip meeraasa taaguutiminnik annaasaqarnissaanut aalajngerneq maajip aallartinneranili ilisimasimagaa, kunngikkormiut attaveqaqatigiinnermut pisortaata, Lene Ballebyp BT-mut ullormi tassani oqaatigaa.

Prins Joachimilli kunngeqarfiup aalajangerneq siuartissimagaa sisamanngornermi oqaatigaa.

- Pilersaarutigineqartut pillugit maajip ulluisa tallimaanni saqqummiivigineqarpunga. Tassa meeqqama kinaassusertik 25-liigunik annaassagaat. (Prinsesse aaqq.) Athena januaarimi aqqanililiissaaq. Aalajangernerli siuartinneqartoq ullut tallimat sioqqullugit ilisimatinneqarpunga.