Prins Joachimip meeraasa prinsessetut prinsitullu taaguutitik annaagaat
Prins Joachimip meerai Danmarkimi prinsitut prinsessetullu 2023-mi januaarip aallaqqaataaniit taaguuteqarunnaassapput.
Tamanna dronning Margrethep aalajangeraa, kunngikkormiut tusagassiuutinut nalunaarummi allapput.
Kunngikkormiut ernutaasa sisamat Monpezatimit akimarngit ilaatut akimasuullu paniatut tassa grevetut komtessetullu taaguutitik suli atorsinnaassavaat.
- Prins Joachimip kinguaavi excellenceritut taagorneqartassapput. Dronningip aalajangernera kunngikkormiuni allani assigiinngitsuni ukiuni kingullerni naleqqussaasarnernik aallaaveqarpoq, kunngikkormiut tusagassiuutinut nalunaarummi allapput.
Kunngikkormiut oqarnerat naapertorlugu dronningip ernuttami sisamat “kunngikkormiunut atassuteqarnermit killiligaaqqanatik pisussaaffeqaratillu” kiffaanngissuseqarnerullutik namminneq inuuneqarsinnaanissaat siunertaraa.
Pineqartut tassaapput prins Joachimip grevinde Alexandralu ataatsimut meeraat Nikolai 23-nik ukiulik, Felix 20-nik ukiulik aamma prins Joachimip prinsesse Marielu meeraat Henrik 13-inik ukiulik kiisalu Athena qulinik ukiulik.
Alexandra: Meeqqat avissaartitaasutut misigisimapput
Naak ernutaasut sisamat taaguutitit annaagaluarlugit kingornussisussatut tulleriiaarneranni inissisimaffimminniiginnassapput.
Taamaakkaluartorli aalajangerneq BT-p allaaserisaa naapertorlugu ernutaasut sisamat angajoqqaavisa – prins Joachimip, prinsesse Mariep grevinde Alexandrallu paasiuminaatsippaat.
- Aalajangerneq tamatta paasiuminaatsipparput. Aliasullutaluta tupaqqavugut. Tassanngaannartumik aalajangerneruvoq. Meeqqat avissaartitaasutut misigisimapput. Kinaassusertik sooq arsaarinnissutaanersoq paasisinnaanngilaat, grevinde Alexandra nammineq, prins Joachim aamma prinsesse Marielu sinnerlugit BT-mut oqarpoq.
Aappariit meeqqatik marluk prins Henrik aamma prinsesse Athena ilagalugit Parisimi najugaqarput.
Prins Christian kisimi kunngikkormiut akissaataannik pissarsissasoq
Kunngikkormiutut taaguutit sisamat peerneqarnissaannik aalajangerneq 2016-imi maajimi aalajangernerup ilassutigigaa kunngikkormiut allapput. Tassani prins Chrisitian dronningip ernutaani kisimi kunngikkormiut akissaataannik - tassa ukiumoortumik aningaasanik kunngikkormiuniittunut naalagaaffimmit tapiissuteqarfigineqartartussatut naatsorsuutigineqartoq nalunaarutigineqarpoq.
Prins Christian kunngissap Frederiup kunngissallu nuliata Maryp meeraanni angujullerpaavoq. Taanna 15-inik ukioqarpoq danskillu kunngikkormiuni nangitsisussat aappaattut inissisimalluni. Taassuma angutaa dronning Margrethe taarserlugu kunnginngortussani siulliuvoq.
Prins Christianip qatanngutai nukarliit pingajuatut, sisamaatut tallimaatullu inissisimapput. Tamatuma kingorna prins Joachim inissisimavoq Joachimillu meerai tamatuma kingornaniillutik.
