Pridemik taallugu unnugu ingerlaaqatigiinnermi pikialaartoqassasoq

Suiaaqatiminnoortartut allallu suiaassusertik pillugu immikoortinneqarusunngitsut Pridemik taallugu unnummut arfinermiit ingerlaaqatigiissapput.

Nuummi siallerluni anorleraluaqisoq, Katuap silataaniit suiaaqatiminoortartunit ingerlaartoqalerpat aqquserngit taakkunannga qalipaasersorneqassapput.

Assigiinngissuseq asanninnerlu ingerlaaqatigiinnermi persuarsiutigineqassapput. LGBTQ+-it pingaartitaasa ilaat, tassalu suiaaqatiminnoortartullu allallu suiaassusertik pillugu immikoortinneqarusunngitsut ''Pride'mik ingerlaarnerminni ersersinniarpaat.

LGBTQ+-ikkut oqaluttuaraat taakku katissinnaallutik meerarsiartaarsinnaasut, saniatigullu allatuulli atugassarititat pisinnaatitaaffillu piginagit. Taamaattumik tamakkunannga pitsanngorsaarusupput.

- Pisinnaatitaaffiit, maanna pisinnaatitaaffeqarpianngilagut siullerpaameernitsinnilu neriuppunga politikerit takusinnaassagaat pisinnaatitaaffeqarpianngitsugut, Katharina S. Qvist Greenland+-imi siulittaasup tulliusoq oqarpoq.

- Aamma soorlu inuit transiusut maanna hormonbehandlingerneqarsinnaanngillat pisinnaatitaaffeqannginnatta tamanna pisassagaanni Danmarkimi najugaqartariaqassaaq, taanna oqarpoq.

- Katuamiit una aaqqissuupparput Greenland+ suleqatigalugu. Taakkua Greenland+-ikkut siunertarivaat kikkunnulluunniit inissaqartitsinissaq, Katuami nipilersortunik aaqqissuisartoq Birthe Olsen KNR-imut oqarpoq.

Suiaaqatiminoortartut anguniagaannut tapersersuisut ingerlaaqatigiinnermi tikilluaqqusaapput.

Katuami dragshowertoqarluni qitittoqassasoq 

Ingerlaaqatigiittoqareerpat Nuummi kulturip illorsuani Katuami unnukkut nalunaaqutaq 19.30 nuannannertalimmik, qitinnertalimmik dragshowernertalimmillu unnussiuaaqatigiisitsisoqassaaq.

- Katuamiit una aaqqissuupparput Greenland+ suleqatigalugu. Taakkua Greenland+-ikkut siunertarivaat kikkunnulluunniit inissaqartitsinissaq. Taamatullu aamma avammut saqqummernikkut taamatut kanngunarsaanerit aamma uparuartuisarnerit kinaassutsimik naqisimaneqarnerit aamma qanoq akiueqataassalluta tamakkununnga pingaartittorujussuaarput, Katuami nipilersortunik aaqqissuisartoq Birte Olsen KNR-imut oqarpoq.

Ingerlaaqatigeereernermi Katuami assigiinngitsunik takutitsinernik aaqqissuussisoqassaaq, soorlu DJ Liam, qitittartut NuQi aamma dragquuen Jaxie aliikkusersuissapput.

Dragqueen Jaxie Danmarkimi dragqueenini takutitsillaqqinnerpaatut siorna ajugaavoq.

Katuamut unnugu iserneq 120 krouuneqassaaq. Uani isissutissarsisoqarsinnaavoq, isissutissarsisimanngikkaannilu isernermi akiliisoqarsinnaavoq.

Aaqqissuussineq Katuami naammasseriarpat imerniartarfinni Daddy´simi, Garagenimi Killunilu unnugu aqqanermut nanginneqassaaq.

Dragqueen Jaxie Garagenimi unnuaru ataatsimut aamma aliikkusersuissaaq.