Præsident Putinip nunamut sanilerisaminut atomimik sakkoq inissikkaa

Russit præsidentiata Putinip atomimik sakkuliaq nunamut sanilerisaminut Belarussimut inissippaa, oqaasertalerlugulu USA-p pineratulli iliorniarluni, tassa atomimik sakkumik nunamut iligisaminut inissiilluni.

Russit nutaarsiassaqartitsiviat Tass naapertorlugu; russit præsidentiat Vladimir Putin oqarsimanerarneqarpoq, pilersaarusiornerminut atatillugu atomimik sakkunik nunamut sanilerisaminut Belarusimut inissiilluni, taamaaliorninilu Belarusimiit tamanna noqqaassutigineqarmat.

Putin erseqqissaavoq, tamanna Belarusimiullu akunnerminni isumaqatigiissutigisimagitsik.

Putinip oqarnera naapertorlugu, Belarusimi præsidentip Aleksandr Lukasjenkop piffissami sivitsortumi apeqqutigisarsimagaa, tassa atomimik sakkumik nunaminniititsinissartik.

- Lukasjenkolu isumaqatigiissutigaarput, atomimik sakkussainik Belarusimut inissiiniarluta, Putin taama isumalimmik oqarpoq.

Nangillunilu qalleqqissaavoq, USA-tulli iliorluni.

Rusland piffissami sivitsortumi nunamut Belarusimut tassa Ruslandip Ukrainellu akornanniittumut kaammattuisarsimavoq Ukrainemut saassussinerminnut Belarus aamma akuunerusarsinnaasoq.

Atomi atorlugu sakkut sorsunnermi matumani atorneqarsimanngillat, atorneqaraluarunillu akeqqanik taakkualu sakkuinik suujunnaarsitseriaannaapput.

Siorna februaarip 24-iani Putin aalajangermalli Ukrainemut russit isaassasut, Putinip taamanili Ukraine nunallu killiit qunusaartuarpai atomimik sakkut atoriaannaagitsik.