Poul Krarup: Aalisarnermut politikki avissaartuussutigipallassavaat
Nunatta aalisarnermut politikkia eqqarsaatiginerullugu, Siumup partiit talerperliit peqatigalugit Naalakkersuisooqatigiilerneranni taakku aallaqqaataaniit assoralisimaarnissaat, Sermitsiap pisortaata, Poul Krarupip siulittuutigaa.
Allattoq Niels Krogh Søndergaard
decembarip 05-at 2014 07:58
- Naalakkersuisooqatigiilersut partiit ikippallaarnerisa pilersissavaa, aalisarnermut politikki eqqarsaatigalugu aallaqqaataaniit suleqatigiit partiit assoralisimaalernissaat, nittartakkami Sermitsiaq.ag-mi, Poul Krarup ilaatigut taama allappoq.
Taassuma taama isummersornerminut tunngavilersuutigaa, Partii Naleqqap naqisimaneqaratik illuatungiliuttuunermini aalisartutullu atugarisaat eqqarsaatigalugit, aalisagartassiissutinik amerlanernik noqqaajuarnissaat. Tamannalu partii Siumup Inatsisartunut ilaasortaasa avissaartuutilerneranik kinguneqarsinnaasoq, Poul Krarup siulittuivoq.
Taanna aamma allappoq, Naalakkersuisooqatigiit urani pillugu politikkikkut anginiagaat eqqarsaatigalugit, uranimut apeqqut kiisami inissivinneqartussanngussagunartoq.
