Helle Thorning-Schmidtimik qalipagaq uleerneqartoq
Politikerit assigiinngitsut, tusagassiortut, eqqumiitsuliortoq assimik qalipaasoq pingaarnertullu inuttaasoq Christiansborgimi ilassinninnermi peqataaneranni tamanna pivoq, assingalu Christiansborgimi aamma nivingassaaq.
Assimik qalipaasussaq kinaassanersoq statsiministeriusimasup ileqqoq malillugu nammineq toqqartarpaa, Helle Thorning-Schmidtillu eqqumiitsuliortoq Ditte Ejlerskov assimik qalipaasussatut toqqarsimavaa, Danmarkimi arnat akornanni siulliulluni statsministeriusimasup assinga taassuma qalipammagu.
Folketingip siulittaasuata Pia Kjærsgaardip qalipakkamik uleersinermi Helle Thorning-Schmidt qunusuitsutut taallugu nersualaarpaa, namminerlu ernuttaminut maligassiuilluartutut aamma taallugu:
- Ernuttama peroriartorneranni tv-kkut saqqummertarputit. Qularutiginngilara pinnguarnerminni oqaloqatigiinnerminnilu isiginnaarut qiviariarlugu ilaatigut eqqarsartarsimassasut: Ajoranimi una arnaq, Pia Kjærsgaard oqarpoq.
Helle Thonring-Schmidtip assinga Christiansborgimi Vandrehalimi nivingassaaq, siornatigut statsiministeriusimasut assingi amerlasuut tassani aamma nivingapput.
