- Suliumajunnaarutta portørit ambulanceniittut suliinnassapput, taamaammat innuttaasut ernumassutissaqanngillat, Ujarak Jessen Heinrich.Assi: Forsvaret

Portørit peqatigiiffiat: Utaqqeqqissinnaajunnaarpugut massakkut suliumajunnaarusuppugut

Portørit akissarsiaminnik naammaginninnatik suliumajunnaarniarput. Taakku akissarsiaasa 8 procentiinik qaffanneqarnissaat kissaatigaat.

Naqqiut: Allaaserisap saqqummeqqaarnerani allakkaluarpugut qulinut sulinermik unitsitsigallartoqarnerani akunnernik qulingiluanik sulinerminnik unitsitsigallassasut, tamanna kukkuneruvoq. Minutsinik 59-inik unitsitsigallartoqarpoq.

 

Portørit utaqqeqqissinnaajunnaarput. Akissarsiaminnik naammaginnikkunnaarlutik suliumajunnaarnissaminnik

pilersaarusiorput - SIK akissarsianut tunngatillugu Namminersorlutik Oqartussanut isumaqatiginninniarnerat arriippallaartoq portørit isumaqarput.

- Isumaqatiginninniarnerit SIK-mit tigummineqarnerat kipiluttunartorujussuartut tiguarput. Isumaqatiginninniarnerit nammineq tigummisuugutsigit, taavalu aamma suliumajunnaarsinnaatitaasuugutta ullumikkumiit suliumajunnaarsimassagaluarpugut, portørit peqatigiiffiani siulittaasoq, Ujarak Jessen Heinrich oqarpoq.

Portørit suliffimminni atukkaminnik naammaginninngittareerput.

Nunatsinni portørit akissarsiaminnik naammaginninnatik sulinerminnik 2019-imi februaarimi unitsitsigallarput.

Aamma 2021-imi portøritut sulinerminni suliassat akisussaaffiillu sulisut amerlassusaannut naleqqussorinagit sulinerminnik akunnernik sisamanik unitsitsigallarput.

AAMMA ATUARUK Illoqarfinni arfinilinni portørit sulinerminnik unitsitsigallarniartut

Portørit akissarsiaat 2 koruuninik 20 ørenilu 2019-imi qaffanneqarput, taakkuli naammaqqajanngitsut, Ujarak Jessen Heinrich oqarpoq.

Nuummi innuttaasut amerliartornerat ilutigalugu portørit ulapikkaluttuinnarlutillu aningaasarsiatik naammakkunnaaraluttuinnartut, taakku isumaqarput.

Portørit qaammammut 19.674,43 koruuninik akissarsiaqarput.

- Tusagassiuutinut nalunaarutigivarput utaqqisinnaanerput tamaannga killeqartoq, utaqqisinnaajunnaarluta. Taava Sulinermik Inuussutissarsiuteqartut Kattuffiat sakkortuumik piumasaqarfigivarput maannakkumit suliumajunnaarumalluta, naammaleqaaq utaqqeqqissinnaanngilagut, Ujarak Jessen Heinrich oqarpoq.

Portørit suliumajunnaarnissaat sapaatit akunnerata tulliani pinissaa pilersaarutaagaluarpoq, taakkuli utaqqeqqissinnaannginnamik ullumi nalunaaqutaq qulinut, minutsinik 59-inik sulinerminnik unitsitsigallarniarlutik aalajangerput, taamaaliornerminnillu SIK-mut Namminersorlutillu Oqartussanut tuavisaarinetut iliuuseqarlutik nassuiaapput.

Akissarsiasi qanoq annertutigisumik qaffaavigineqarnissaat kissaatigigassiuk?

- Akissarsiagut 8 procentimik qaffanneqarpata nuannaassaqaagut, portørit peqatigiiffianni siulittaasoq oqarpoq.

AAMMA ATUARUK Portørit SIK-p Namminersorlutik Oqartussallu isumaqatigiissutaannut pakatsisut

SIK portørit akissarsiaasa qaffanneqarnissaannut Naalakkersuisunik isumaqatigiinniartuuvoq.

Kattuffimmi siulittaasoq, Jess G. Berthelsen, qaammatit tallimat matuma siornali ilaasortami aningaasarsiaasa qaffanneqarnissaannik Namminersorlutik Oqartussanut isumaqatiginninniarlerpoq, sulilu ullumikkut angusaqangaarnani taanna KNR-imut oqarpoq.

- Sapaatit akunneri marluk qaangiuppata, Namminersorlutik Oqartussanut portørit akissarsiaannik qaffaanianngippata, taava portørit nunatsinni illoqarfinni aalajangersimasuniittut suliumajunnaarnissaat akueraara, SIK-p siulittaasua oqarpoq nangillunilu:

- Kisianni SIK-mi siulersuisuunerit ataatsimiissutigeqqaassavarput suliumajunnarnissaq qanorpiaq pileraarusiorneqassanersoq, tassami portørit tamarsuisa ataatsikkut suliumajunnaarsinneqarsinnaanngillat.

Portørit suliumajunnaarranneranni portørit pingasuinnaat sillimasuussapput

Qanorluunniit pisoqarsinnaasarmat, portørit innuttaasunit pisariaqartinneqartuaannarput. Portørit suliumajunnaarnissaat piviusorsiornerua?

- Suliffeqarfimmi sumiluunniit sulisut akissarsiaminnik qaffaavigineqarnissaminnik noqqaajuaraluartut kikkulluunniit tusaaneqanngiinnarunik suliumajunnaarsitaapput, SIK-p siulittaasuat Jess G. Berthelsen oqarpoq.

Nuummi portørit katillugit aajuku:

Nuummi portørit katillugit 22-iupput. 

Nuummi innuttaasunit 19.000-iusunit portørit pingasut ambulancenit piareersimatinneqartarput.

Dronning Ingridip Napparsimmavissuani portørit marluk sulisarput.

Portøri ataaseq pilattaavimmiittarpoq.

Portørit pingasut angallassillutillu tikittussanik aallartussanik angallasisarput.

Ullormut portørit qulingiluit sulisarput.

Namminersorlutilli Oqartussat akissarsianik qaffaassutissatut neqeroorutaat SIK-mit naammagineqanngilaq.

- Una uanga isumaqatiginninniarnertut taanissaa apeqquserpara, pissutigalugu namminneerlutik neqerooruteqarput isumaqatiginiaqqaanngivilluta, uagullu taanna neqeroorut akuersaanngilarput. Alloriarnissaq tulleq tassaassaaq ilaasortatsinnik suliumajunnarsitsinissaq, Jess G. Berthlsen oqarpoq.

Portørit peqatigiiffiannit tassunga isumaqataapput.

- Suliumajunnaarutta, suleqatigut pingasut pinasuartumik pisoqarnissaanut sillimajutitaajumaarput, taakkuuppullu ambulancemiittussat.

- Akissarsiat qaffanneqarnissaat anguniarparput, taavalu sutigut tamatigut kingulliunneqartuaannarnerput naammaleqaaq, uaguunnaanngitsoq aamma sulisartoqaterpassuagut allat. Naammagittarsinnaanerput tamaannga killeqarmat, Portørit peqatigiiffianni siulittaasoq, Ujarak Jessen Heinrich oqarpoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl