Politikkikkut malinnaasoq: Pele Brobergip nunaqarfinni qinersisartoqartinniarsarissavaa
- Hans Enoksenimit nangitsinermi soorunami suliassaqassaaq.
Aviisimi AG-mi aaqqissuisuuneq, Christian Schultz Lorentzen Naleqqap siulittaasortaava Pele Broberg pillugu oqarpoq.
Naleqqap nuna tamakkerlugu juunip ulluisa 25-anni immikkut ittumik ataatsimeersuarnermini Pele Broberg siulittaasussatut toqqarpaat. Tamanna Hans Enoksenip sapaatip akunnerata siuliani ataasinngornermi tassanngaannartumik tunuarneratigut pivoq.
AAMMA ATUARUK Broberg: Hans Enoksenimiit kingornussaq suliarujussuussaaq
Christian Schultz Lorentzenillu oqarnera naapertorlugu Pele Brobergip suliassai ilaatigut nunaqarfinnit taaguussisartunut atatillugu annertupput.
- Pele Broberg nunaqarfinniittunit illoqarfimmiunut samminerusarpoq. Taassuma tulliani qinersisoqarnissaanut nunaqarfinneersut taaguussisariinnarniarnissaat suliassaasa pingaarnerit ilagissavaat. Hans Enoksen sineriammi nunaqarfinneersunit taaguunneqangaatsiartarpoq.
Politikkikkut malinnaasup partiip siulittaasortaanera Naleqqamut taaguussisartunit annaasaqarnermik kinguneqaratarsinnaanerarpaa.
Atassuteqaammik pitsaasumik pilersitsissasoq
Pele Brobergip politikkikkut suliaqarnini 2018-imi Naleqqamit Inatsisartumut qinigaaneranit aallartippoq. Taanna piffinni arlalinni naalakkersuisuuvoq, taamaammat politikkimi nutaraanngilaq, taamaakkaluartorli partiinut allanut atassuteqaammik pilersitsinissamik suliassaqalersoq, Christian Schultz Lorentzen isumaqarpoq.
- Naleqqap partiiaraanini unammillernartoqartipaa, partiillu minnerusut tamarmik suleqatigissaarnissaat pingaaruteqarpoq. Taamaammat partiit siulittaasui assigiinngitsut kaffisoqatigalugit ataatsimeeqatigisassavai.
Naleraq arfininngormat immikkut ittumik ataatsimeerusarpoq, tassanilu Pele Broberg siulittaasussatut toqqarneqarluni. Assi: Else Olsvig / KNR.
Taamaakkaluartorli Inuit Ataqatigiillu qanoq issanersoq apeqquserpaa, Nalerarmi ukioq manna naalakkersuisoqataajunnaarpoq IA-llu Siumut tamatuma kingorna naalakkersuisoqatigilerlugu.
Taassuma illuatungiliuttut partiivini ataatsimoorfeqalissanersoq eqqarsaatigaa.
Kisianni qanorluunniit pisoqaraluarpat Pele Brobergip suliassamik qanoq ingerlatsinissaa pissanganarpoq.
- Politikkimi taamaappoq, tassa inummut attuumassuteqqajuppoq, naalli uanga Hans Enoksen nuannarineqarluaraluartutut isigaluariga Pele Broberg immaqa allamik iliuuseqarsinnaavoq. Tamanna piffissap takutissavaa, Christian Schultz Lorentzen oqarpoq.
Avissaarnissap sulissutiginera
Naleqqap nalinginnaasumik ataatsimeersuarnissaq pilersaarusiorpaa, ataatsimeersuartoqannginneranili politikkikkut sammiviup nutaamik siulersuisoqalernerani qanoq innera oqaaseqarfigiuminaassinnaasoq, Christian Schultz Lorentzen isumaqarpoq.
Pele Brobergilli politikkimi suliat aalajangersimasut ilaat malunniuteqarfilluarpai, ilaatigut Danmarkimit avissaarnissaq, taamaammat politikkimut tamanna qanoq sunniuteqarsinnaanera isumaliutigineqarsinnaavoq.
- Pele Broberg avissaarnissamut apeqqummut atatillugu ilisimaneqarpoq, aamma Danmarkimit avissaarnissaq pillugu inunnut taasititsinermi kikkut taasisinnaassanerannut apeqqummut atatillugu. Danmarkimit avissaarniarnissamut tassa namminiilivinnissamut oqallinnermut tunngatillugu sukkanerusumik iliuuseqartoqarusussanersoq apeqqutaaginnarpoq, Christian Schultz Lorentzen oqarpoq.
AAMMA ATUARUK Pele Broberg Naleqqami siulittaasunngorpoq
Politikkikkut angunikkani matumani piffissami allanngortoqarnavianngitsoq aamma namminiilivinnissamut atatillugu suliaqarneq partiimut qitiuinnassasoq Pele Brobergip arfininngormat ataatsimeersuarnerup kingorna oqaatigaa.
