Broberg: Hans Enoksenimiit kingornussaq suliarujussuussaaq
- Tulluusimaaqaanga ataqqinnillungalu.
Pele Broberg, Naleqqap siulittaasussaatut qinigaaqqammerluni taama oqarpoq.
- Nuannaaqaanga, ulloq misigissuserpassuarnik miisigisaqarfiuvoq. Hans Enoksenip tunuarneratigut siulittaasutut kivitassaq suliassaavoq annertooq, tamanna qularutigineqassanngilaq. Pele Broberg Naleraq immikkut ittumik ataatsimeersuareersoq taama oqarpoq.
Naleqqap immikkut ataatsimeersuartitsinera Inatsisartuni allaffiata ataatsimiittarfiani ingerlanneqarpoq. Ilaasortat ilaat takkullutik peqataapput amerlanerilli qarasiaasiakkut sinerissamit peqataallutik.
Immikkut ittumik ataatsimeersuarnermi siulittaasussamik toqqaasoqalernerani malunnarsereerpoq Pele Broberg ilaasortani amerlasuunit siulittaasussatut piukkunneqartoq kaammattorneqartorlu.
Pele Broberg siulittaasussatut immikkut ittumik ataatsimeersuarnissaq sioqqullugu sassarniuteqarsimanngikkaluartoq oqarpoq siulittaasumut kaammattorneqassaguni, suliassaq tigussallugu. Allamillu unammillerteqarani siulittaasunngorpoq.
Hans Enokseni taarserpaa
Pele Brobergip Hans Enoksen Naleqqamik 2014-imi pilersitsisuusoq, taamanerniillu manna tikillugu siulittaasuusimasoq taarserpaa.
Nutaamik siulittaasortaarneq partiimik aqutsinermut partiillu politikkikkut suliniutaanut sunniuteqangaarnavianngitsoq siulittaasunngortoq oqarpoq. Tassami partiip pingaarnertut anguniagaa, tassalu nunatta namminiilivinnissaanik sulissuteqarneq nanginneqassasoq Pele Brobergip erseqqissaatigaa.
-Tamatumani inuit paasinnilernissaat pillugu paasisitsiniaangaatsiartussaassaagut namminiliivinnissaq pillugu sulinermi katataasoqannginnissaa pillugu.
Partiip ataatsimeersuarnissaani partiip politikikkut anguniagai nutaamik qaqinneqassasut siulittaasunngortoq aamma oqarpoq.
Partiip iluani attaveqatigiinnerunissaq ujartorneqartoq
Naleqqap immikkut ittumik ataatsimeersuarnerani ataatsimeersuaqataasunit arlalinnit partiimi siulersuisut sinerissamilu immikkoortortat akornanni attaveqaqatigiinnerunissaq ujartorneqarpoq.
Ujartorneqartorlu siulittaasunngortup paasilluarsinnaavaa:
- Tassa siulersuisuunerniissimasut arlallit, allaat ukiut arfinillit tassaniinnikuullutik - qasusut ilaasa nalunaarutigigamikku - tupinnannginnami. Taamammat massakkut unammillernartussaa tassaassaaq immikkoortortaqarfiit ulluinnarni attavigineqarnissaat, ullut tamaasaanngikkaluartoq, kisianni isumaasa apuussornissaat pingaaruteqartorujuussaaq, Pele Broberg oqarpoq.
