33- nik ukiulik Aqqalu Jerimiassen sapaatip akunnerata naanerani Atassummi siulittaasunngorpoq.Assi: KNR / Malik Brøns

Politikkikkut Atassummik tunuliaqutilinni peroriartortoq

Anguniagaqallaqqippoq malartaattuullunilu angusassani angutserlugu. Aamma ilaqutariinni politikkikkut Atassummik tunuliaqutaqartuni peroriartorpoq. Atassutip siulittaasortaavata ilisarnaataasa tassa ilaat.

Avannaata Kommuniani kommunalbestyrelsimi maanna qinerneqarnerpaanikuulluni ilaasortaavoq. Kommunalbestyrelsimummi qinersinermi 2017-imi tupaallatsitsilluni ilaasortanngorpoq.

Aqqalu Jerimiassen juulip 24-ani 1986-imi inunngorpoq. Najattaaq Mørch Jerimiassen nuliarivaa. Marlunnik meeraqarput.

 

Avannaata Kommuniani kommunalbestyrelsimi aamma Inatsisartuni ilaasortaavoq.

 

Politikikkut misilittakkat:

2014 - 2016 Atassutip Inuusuttaasa siulersuisuunerini ilaasortaavoq

2016 - 2018 Siulittaasoq, Atassutip Inuusuttai

2015 - 2019 Ilaasortaq, Atassutip siulersuisuuneri

2019 -           Atassummi siullittaasoq

 

Qinersisit:

2005: Inatsisartunut qinersinermi 16-inik qinerneqarpoq

2014: Inatsisartunut qinersinermi 20-nik qinerneqarpoq

2017: Kommunalbestyrelsinut qinersinerni 530-nik qinerneqarpoq

2018: Inatsisartunut qinersinermi 320-nik qinerneqarpoq

- Anguniagaqallaqqippoq malartaattuullunilu angusassani angutserlugu. Taavalu aamma oqaatsini piviusunngortissinnaasaramigit.

Taama Aqqaluk Heilmann, Avannaata Kommuniani kommunalbestyrelsimi Aqqalu Jerimiassenimut Atassut sinnerlugu ilaasortaaqaatasoq oqarpoq.

AAMMA ATUARUK Inuusuttoq sulinissaminut piareersimavoq

Avannaata Kommuniani borgmesterip, Siumumeersup Palle Jerimiassenip, Aqqalu Jerimiassen aamma ilisarisimalluarpaa.

- Tassami soraluarigakku inuttut nalunngilluarpara. Aamma Aqqalup meeraallunili - immaqa uagut politikkiinnartuugatta - politikkip akornani alliartornikuuvoq.

Aqqalu Jerimiassen 19-inik ukioqarluni politikkimi saqqummeqqaarpoq. Tamanna pivoq 2005-imi Inatsisartunut qinersinermi. Taamani 16-inik qinerneqarpoq. Ukiullu qulingiluat qaangiunnerini 2014-imi misileeqqippoq. Kisianni aamma taamani iluatsitsinngilaq. 20-nimmi qinerneqarpoq. Kisianni 2017-imi Avannaata Kommunianut 530-nik qinerneqarluni tupaallatsitsilluni ilaasortanngorpoq.

- Oqalukkaangami uppernarpasissumik, paasisimasaqarluarpasissumillu, oqaluttarnini iluaqutigivaa. Taamaalilluni aamma innuttaasunik tigusisinnaanini tassuunakkut pigalugu, Palle Jerimiassen oqarpoq.

AAMMA ATUARUK Kinguaariit nikinnerat Atassutip neriulluarnartoqartippaa

Aqqalu Jerimiassen Atassup siulittaasuatut sapaatip akunnerata naanerani qinerneqarpoq. Tamannalu Palle Jerimiassenip tupaallaatiginngilaa. Palle Jerimiassenimi naapertorlugu Aqqalu Jerimiassen ilaqutariinni politikkikkut Atassummik tunuliaqutaqarfiusumi peroriartorsimavoq.

- Taamaattumik kaammattorluarneqarami tassunga anngunnissaa ilimanarnikuuvoq. Atassutip nutarterniarnerani ersarinnnerpaajunikuungami tupiginngilara massakkut tassunga inissimmat, siulittaasunngortup akkaava aamma Avannaata Kommuniata qullersaa oqarpoq.

Kisianni Aqqalu Jerimiassen allatuulli aamma sanngiiffeqarpoq.

AAMMA ATUARUK Avannaata Kommuniani Siumut Atassullu suleqatigiikkunnaartut

Tamanna parteeqataata Qaasuitsup Kommuniata kommuuninut marlunnut, Kommune Qeqertalimmut aamma Avannaata Kommunianut, maanna partiimi siulittaasup ilaasortaaffigisaanut, avinneqarmat maluginiarsimavaa.

- Nikalluallassinnaanerit kamaammersinnaanerillu soorunami aqqusaangassaasaramik. Malugigakku inuusuttunnguulluni, anginerusumik ikaarsaariarnermi ataatsimiititaliamiilluta, aqqusaarsimanngikkai, taava oqaloqatiginikuuara suut aqqusaartortarumaarai, Aqqaluk Heilmann oqarpoq.

Akkaavali soralussani Atassummi siulittaasunngormat qanoq eqqarsarpa?

- Allat isumaannik tusarnaarnerunissani ilikkarnerusariaqassavaa, Palle Jerimiassen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat