Kinguaariit nikinnerat Atassutip neriulluarnartoqartippaa

Atassut Nuummi ippassaq arfininngornermi ataatsimeersuarpoq, Aqqalu Jerimiassenilu maannamut siulittaasoq Siverth K. Heilmann kingoraarlugu siulittaasutut tassani qinerneqarluni.

Atassutip siunissami politikkissaa pillugu sapaammi isumasioqatigiittoqarpoq, Atassutillu siunissami inissisimanissaa pillugu Aqqalu Jerimiassen isumalluarpoq.

- Atassummi aqutsisut nutaat sinniisuutitanit tamakkiisumik tapersersorneqarput. Partiimilu ineriartornerup ingerlalluaannarnissaa qularutiginngilara, Atassutip siulittaasortaava oqarpoq.

Atassutip qinersisai ukiuni kingullerni ikiliartorsimapput, tamannalu pillugu Atassut maanna suliniuteqalersoq, Aqqalu Jerimiassenip oqaatigaa:

- Isumaqarpunga pitsaasumik uani aaqqiissuteqarnikuulluta, tassami Atassutip inuusuttaasa siulittaasuat Emma Lennert ulluinnarni aqutsisunut ilanngunneqarami, taannaavorlu inuusuttunik annertuumik katersinermi suliaqartuusoq, inuusuttorpassuarnik Atassutip inuusuttaani ilaasortaatsisumik. Atassutillu nalorninaatsumik inissisimanissaanik aamma suliniuteqarniarpugut, Atassutip siulittaasortaava Aqqalu Jerimiassen taama oqarpoq.

Nunatta namminiilivittunngornissaa Naalagaaffeqatigiinnerulli attatiinnarneqarnissaa pillugu partiip iluani aamma oqallittoqarpoq, isumasioqatigiittoqarneranilu tamanna eqqartorneqartunut aamma ilaalluni:

- Namminiilivinneq imaluunniit naalagaaffeqatigiinneq. Naalagaaffeqatigiinneq pillugu Atassut pilersinnneqarnikuummat isumaqarpunga Atassut tassunga inissinneqaqqinnissaanut suliat maanna aallartittut, Aqqalu Jerimiassen oqarpoq.

Maanna naalakkersuisut suliassatik suliariinnassavaat, Atassullu illuatungiliuttutut inissisimalluni ersarissumik nipeqarnissaa, Aqqalu Jerimiassenip sulissutiginiarpaa:

- Suliassatik taakku suliarissavaat. Uagut Atassummiit niperput pingaarnerujumaarpoq qanoq issanersoq. Ataasiakkaarlugit nalilersussallugit pisariaqarsorinngilara. Naalakkersuisut amerlanerussuteqartunit tunuliaqutserneqarunik tamat oqartussaaqataanerisa aqqani tamanna ataqqisassaavoq. Uagulli taamaallaat ersarissamik illuatungiliinitsinni nipeqartarnissarput pingaarneruinnassaaq. Maannakkut siulittaasuujunnaartoq Siverth K. Heilmann inatsisartuni suleqatigalugu taamatut ingerlanerput nangissavarput, Atassutip siulittaasortaava Aqqalu Jerimiassen oqarpoq.
Aqqalu Jerimiassen 16-init taaguunneqarluni siulittaasutut qinerneqarpoq, unammillertaa Paninnguaq M. Kruse arfinilinnit qinerneqartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat