Avannaata Kommuniani Siumut Atassullu suleqatigiikkunnaartut
- Partii marluk imminnut isumaqatigiinngillutik tassani naapinniaraluarlutik naapissinnaannginnamik taamatut inissisimalersimapput, borgmesteri, Palle Jerimiassen oqarpoq.
Atassutip borgmesterimut tullersortutitut inissaq Atassummiiginnarnissaa kissaatigigaluarpaat, tamannalu akisunaarpaat:
- Allanngortitserusunnikuunngilagut uagut isumaqatiginninniarnermi tunniunneqarnikuusut soorunami noqikkatsigit, aamma Aqqalu Jeremiassen qanoq ilisumi naalakkersuisuujunnaassagaluaruni tassunga iniminut peqqittussaanerani eqqarsaatigalugu. Kisianni ataqqivarput soorunami Siumukkormiut maanna pissusilersuutigisaat uagut allanngortissinnaanngilarput amerlanerussuteqaramik, Atassummeersoq, Aqqaluk Heilmann oqarpoq.
AAMMA ATUARUK Inuusuttoq sulinissaminut piareersimavoq
Ane Lone Bagger viceborgmesterinngortoq
Atassutip borgmesterimut tullersortitut inissaq pigiinnarnissaanut isumaqatigiissutaasimasumi immikkut allassimanngitsoq, Siumumiit oqaatigineqarpoq.
- Kommunalbestyrelsip sulinermini malitassai malillugit una ingerlanneqarpoq. Tassani ilimanami viceborgmesterimut qinersisoqarnialermat ataasiinnaq sassartinneqarpoq, tassa Ane Lone Bagger. Allanik sassartoqanngilaq.
Siumukkut maanna avannaata kommunalbestyrelsiani ataatsimik amerlanerussuteqarput, Siumup iluani isumaqatigiinngittoqarpammi qanoq iliussappat?
- Taamatut massakkut pisoqarnissaanut ilimasunngilanga aamma politikkikkut partii allat tamavimmik suleqatigalugit tamakku anguniarnissai naatsorsuutigilluinnarakku ingerlanissarput ernumaginngilluaasarpara, borgmesteri oqarpoq.
