Inuusuttoq sulinissaminut piareersimavoq

Naalakkersuisussatut innersuunneqartut nutaartaasa ilagaat Atassummeersoq Aqqalu Jerimiassen. Taanna Inuussutissarsiornermut, niuernermut nukissiuuteqarnermullu naalakkersuisussatut innersuunneqarpoq.
Assi © : KNR
Allattoq Ane-Marie Petersen, Inge S. Rasmussen
maajip 11-at 2018 14:19

Inuusuttorlu 31-nik ukiulik innersuunneqarnerminut tupaallaqqavoq.

- Nuannerpoq aamma tuppallernartorujuuvoq siulittaasuma innersuussinnaammanga. Tullusimaarnarpoq kisianni soorunami aamma akisussaaffiliivoq, Aqqalu Jerimiassen oqarpoq.

Taanna Avannaata Kommuniani kommunalbestyrelsimut ilaasortaavoq, taamatuttaaq Avannaata Kommuniani borgmesterip tulliatut siullertut inissisimalluni. Naalakkersuisunilu ilaasortanngortussanngorami kommunalbestyrelsimi ilaasortaaffimminit sulinngiffeqarnissani qinnutigisussanngorlugu.

AAMMA ATUARUK Naalakkersuisut nutaat takukkit

AAMMA ATUARUK Naalakkersuisuni arlallit tupaallaataapput

Naalakkersuisutullu sulinissaminut piareersimalluarnerarpoq.

 - Piareersimasimagama angerpoq. Taamannak piukkunneqarneq, soorunami toqqammavissaqarsimammat piukkussipput. Eqqarsarluaqqaarpunga soorunami illoqarfimma qimannissaa eqqarsaatigilluaqqaarpara,

Taanna Atassutip inuusuttaanit kommunimut qinersinermut qineqqusaarnermini kinguaariinnit nikittoqarnissaa sukataarussimavaa. Sukataarnerminilu taamarsuaq angusaqarnissani takorloorsimanngikkaluarpaa.

- Kisianni taama takorluugaq annertutiginngikkaluarpoq, ukiut marluk iluinnaani naalakkersuisutut allaat innersuunneqassallunga. Ilaana nikeriarnerujussuuvoq. Tupinnarpoq kingumut eqqarsaatigalugu, Aqqalu Jerimiassen Ane-Marie Petersenimut oqarpoq.

Aqqalu Jerimiassen naalakkersuisutut ivertinneqaruni Inatsisartuni ilaasortaaffissaraluaminit sulinngiffeqassalluni aamma oqaatigaa. Taamaalilluni sinniisua Bentiaraq Ottosen Inatsisartuni ilaasortanngussaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk