VIDEO Politikerit peqqinnissaqarfik nalilersuiffigeqqikkusukkaat

Nappaatip paasineqarneranit suliaritinnissamut sukkanerusumik periaaseqartoqartariaqarpoq, Mads Peter Grønvold taama isumaqarpoq. Taassuma erluatigut naasoqarsimanera paasineqarpoq, suliaritinnissamullu utaqqinerani taanna kræftinnguussimavoq.
oktobarip 27-at 2014 13:55

- Allaffissornikkut pitsaanngitsumik ingerlasoqarnera tusartuarpara. Taamaammat ajornartorsiut iluarsineqartariaqarsoraara, Ruth Heilmann Siumumeersoq KNR-imut taama oqarpoq.

AAMMA ATUARUK Kræftimik nappaateqarsimasup kingusippallaartukkut suliaritissimanini naammagittaalliutigigaa


Juliane Henningsenip Inuit Ataqatigiinneersup peqqinnissaqarfiup ajornartorsiutaata qanimut misissuiffigineqarnissaat aamma kissaatigaa.
 
- Soorunami tamakku akuerineqarsinnaanngillat. Nalilersueqqittoqartariaqarpoq, peqqinnissaqarfimmi suna iluatsissimanersoq sutigullu pitsaanngitsumik ingerlasoqarnersoq takuniassagatsigu, Juliane Henningsen oqarpoq.
 
Sulisut akornanni taarseraannerujussuaq ajornartorsiutinut patsisaasoq Neriuffimmit tikkuarneqarpoq. Pitsaaliuinermullu peqqissutsimullu aqutsisoqarfimmi nakorsaanerup Anne-Marie Ulrikip nassuerutigaa allaffissornermi nakorsallu akornanni taarseraannerujussuaq ajornartorsiutaasoq.
 
- Aap, tamanna nassuerutigaarput, aamma iluarsiissuteqarniarluta sulissutigaarput, Anne-Marie Ulrik oqarpoq.
 
- Kalaallit Nunaanniinnaanngitsoq aammali nunani allani nakorsat sulisorineqarusunnerat aamma pissutaaqataavoq. Nakorsat piffissami sivisunerusumi atorfeqartittarnissaat imaluunniit paarlakaannissamik aaqqissuussinermut ilanngutitinneqarnissaat ilungersuullugu sulissutigaarput, taamaaliornikkut atorfigisaminnut utersinnaanissaat taamaatullullu aamma aalaakkaanerusumik pilersitsinissaq anguniarlugu, nakorsaaneq Anne-Marie Ulrik taama oqarpoq.