Politikerit Knud Kristiansenimut: Paasissutissiinngilaq
Tele-Postip piffissaliussaq angumerisinnaassanngikkaa Knud Kristiansen ilisimasimavaa. Taamaakkaluartorli Inatsisartunut, ataatsimiititalianut partiinulluunit ilisimatitsisimanngilaq.
Siunnersortinut aningaasartuutit ingasappallaamik amerliartorsimammata, Tele-Post-imi telekkut sullissinermi namminersortunngorsaaneq kinguartinneqartoq, Siumumit, Demokraatinit, Atassummit, Partii Naleqqamit Inuit Ataqatigiinniillu politikerit marlunngormat paasivaat.
Kinguartitsisoqarsinnaanera Knud Kristiansenip ilisimareersimagaa kingornatigut paasineqarpoq.
Piffissaliussami angumerineqarsinnaannginera Tele-Postip naalakkersuisumut naalakersuisullu siulittaasuata naalakkersuisoqarfianut martsip qeqqata missaani allakkatigut kalerriutigisimavaa.
Kisianni tamatuminnga kikkulluunniit ilisimatinneqarsimanngillat.
Knud Kristiansen nassuigassaqartoq
Inuit Ataqatigiit politikkikkut oqaaseqartartuata Naaja Nathanielsenip tamanna tupigusuutigaa. Taanna isumaqarpoq, Knud Kristiansen nassuiagassaqartoq.
-Naalakkersuisoqarfimmini pisut pillugit ilisimatitsisarnissaq akisussaaffiisa ilagaat. Tasaslu ilisimatittriaqarpaatigut, paasissutissammi tamakkua ingerlateqqinngippagit inuiaqatigiinnit pisut pingaaruteqartut ilisimasinnaanngilagut, Naaja Nathanielsen oqarpoq.
Knud Kristiansenili ippassaq nassuiaavoq, kinguartitsisinnaanerup oqaatiginissaa siusippallaarsutut nalilerlugu nipangersimasimalluni.
Nassuiaallu taanna Demokraatiniit naammagineqanngilaq. Tillie Martinussenimi isumaqarpoq paasitineqartussaagaluarluni taamattoqarsimanginneralu tupigusuutigalugu.
- Soorunami paasissutissat taakkua ingerlateqqinneqarsimasariqaraluarput. Sooq taamaaliortoqarsinannginersoq naluarput. Ilisimatinneqarsimannginnitsinnut suna peqqutaanersoq maanna paasiniarparput, Tillie Martinussen oqarpoq
Akisussaaffik Knud Kristiansenimiittoq
Anthon Frederiksen Partii Naleqqameersoq isumaqarpoq akisussaaffik Knud Kristiansenimiittoq.
- Soorunami taamatut paasitinneqarsimanguni naalakkersuisoq pinngitsoorani pisussaavoq inatsisartunut minnerpaamik ataatsimiititaliamik ilisimatitsissalluni suliap uuma ingerlanerata kinguaattoornera pillugu, Anthon Frederiksen oqarpoq.
IA, Demokraatit Partii Nalerarlu Knud Kristiansenimit nassuiaanneqaqqupput.
Knud Kristiansen oqaaseqartinniaraluaratsigu iluatsinngilarput.