Politikerit Great Greenlandimut tapersiiniarnerat coronamit unitsinneqartoq
Danskip ilusilersuisartup, Jim Jyngvildip kalaallit puisip amianik atisalianik atortut assilisai sapaatini akunnerni arlalinni nunatsinni nunanilu allani uiverutigineqarlutillu oqallitsitsingaatsiarput.
Qarasaasiatigut atsiornernik katersineq, Great Greenlandimit pisiumajunnaarnissamik siunertaqartoq qisuariaatit ilagaat.
AAMMA ATUARUK Aalisartut kattuffiat assit pillugit assuarinninnermut akuliuttoq
Tamanna Naja Lundip oqarnera naapertorlugu Kommune Kujallermi kommunalbestyrelsimi ilaasortat tamarmik akerliuffigalugu puisip amianik sanaamik atorlutik suliffeqarfissuup Qaqortumi Great Greenlandip eqqaanut assilisikkiartorniaraluarput.
Taakku Great Greenlandimut nangaassuteqanngitsumik tapersersuinerminnik takutitsiniarlutik taamaaliorniaraluarput.
- Great Greenlandip atisanik atorluta assilisikkiartorsinnaanerluta saaffiginnissuterput akuerivaa, ullumi qulinut assilisikkiartornissarput pilersaarutaagaluarpoq, Kommune Kujallermi borgmesterip tullersortaa, Naja Lund (IA) KNR-imut oqarpoq.
Tapersiiniarneralli nunarsuarmi tamarmi virusimik tuniluuttumit unitsinneqarpoq.
- Tassa ajoraluartumik allarparujussuit aqqusaagaat uanga aamma aqqusaarpara. Coronalersimallunga ippassaq unnukkut paasivara, taamaalilluni taanna unitsiinnartariaqalersimavarput. Kommunalbestyresit tunillaasueriataarsinnaanerat pinaveersaartinniarlugu, Naja Lund oqarpoq.
AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq
Kommune Kujallermi ilaasortat akornanni tuniluuttoqarnera pissutigalugu tamanna unitsinneqarallarpoq, Naja Lundilli teams aqqutigalugu ataatsimiittoqartarnissaa paasissutissiissutigaa. Great Greenlandimullu tapersiisoqarunnaanngilaq.
- Neriuppunga kommunalbestyrelsit iluanni annertunerusumik tuniluuttoqalersimanngeriarpat Great Greenlandimut tapersersuinerput piffissami qanittumik saqqummiussinnaassagipput, borgmesterip tullersortaa oqarpoq.
Atsiornernik katersineq change.org-ikkut ingerlanneqarpoq, tassungalu inuit 1700-it atsiorsimapput.
