Politiit uparuartuinianngillat

Ajutoornerup paasiniarneqarneranut atatillugu immikkuualuttortai politiiniit tunniunneqarusunngillat, kisiannili ilisimatitsissutigineqarpoq qoorortuumik piginnittoq akiliisitaasimasoq, meeqqat qoorortuumik igeriaannaasumik pinnguaateqarnissaanik periarfississimagamigit.

- Paasiniaanerput tunngavigalugu inuit ilaat illoqarfiup killeqarfiata iluani qoorortuumik igeriaannarmik tigummiaqarluni angalaarsimasoq paasivarput, tamannalu politiit malittarisassaannik unioqqutitsineruvoq akiliisitsinermillu kinguneqarpoq, Politimesterip tullersortaa Morten Nielsen oqarpoq.

Taassuma oqarnera naapertorlugu, qoorortooq igeriaannaq meeqqanut tunniunneqarsimanngilaq, taamaattumillu annikinnerusumik unioqqutitsineq tuusinnterpaalunnguanik akiliisitsinermik kinguneqarsimasoq.

Ajutoorneq niviarsiaqqap angerlarsimaffiata silataatungaani pinnguartoqarnerani  pivoq, kisiannili tassa oqaatigiumaneqanngilaq aallartoorfigitittoq qoorortuumillu piginnittoq ilaqutariissimanersut.

- Ajoraluartumik tamanna pillugu ilisimatitsisinnaanngilanga. Tamanna paasiniaanermut tunngassuteqarpoq, tassami imannak imannallu soorlu aamma taamaaliortoqarnersoq oqaluuserileraluarukku, taava inuit pillugit naliginnaq oqallittoqarnissa tikissavarput, Morten Nielsen oqarpoq.

Niviarsiaraq Tasiilameersoq ajutoornerup kingunitsianngua tuaviornerpaamik Island-imut aallarunneqarpoq, tassani nassamigut pilattartikkasuarpoq anersaartuuserneqarlunilu tamatumalu kingorna meeqqanut immikkoortortamut nuunneqarluni.

Politinit taamanikkut ilisimatitsissutigineqarpoq, meeqqat pinnguartut tamarmik qulit ataallugit ukioqarsimasut, kisiannili tassa Morten Nielsen-ip oqarnera naapertorlugu ajutoornermut alianartumut suna pissutaarpiarnersoq maanna paasiniaqqissaarneqarpoq.

Kisiannili tassa ullumikkut ajutoornerup immikkuualuttortai pillugit tamanut tusarliussaqarnianngilaq.

- Uani pisumi kikkunnulluunniit uparuartuinissarput tunngavissaqanngilaq.
Taamaattumik oqaatigiinnarsinnaavarput una pisoq qoorortuumik pinnguarnerup kingunerisaanik aallartoornerummat. Kisiannili kina imaluunniit arlaat igissimanersoq pingaarnerpaajunngilaq tassami pinnguaqataasimasut tamarmik meeraammata, Morten Nielsen taama oqarpoq.