Politiit tissiartaat ujaarivaat: Angalasut pingaartumik Kujataani alaatsinaaqquneqarput
![](/sites/default/files/styles/image_934x467/public/article_images/pressemeddelelse_30082021_politiet_efterlyser_hollandsk_sejlbaad_billede_af_sejlbaad.jpg?itok=1-4zBd-S)
Angut Hollandimeersoq Islandimit Kalaallit Nunaannut aggustip ulluisa arfineq-pingajuanni aallarpoq, nunatsinnullu aggustip ulluisa 22-anni tikittussatut naatsorsuutigineqaraluarluni.
Ilaqutaasut taama nalunaaruteqarput. Angut aggustip ulluisa arfineq-pingajuannili tusarfigineqarsimanngilaq.
180 sømilitut isorartutigisumik angalareerluni Kalaallit Nunaanni tikitassani siulleq tikissimassallugu ilaquttani nalunaarfigisimavai, Kalaallit Nunaatalu kujasissuanukarsimanissaa ilimagineqarluni.
Issittumi Sakkutooqarfik tissiartaat ullumi ujaarilerpaa, imartaq tissiartaatip ingerlaarfigisimasinnaasaa qulaavaaneqarluni.
Inuussutissarsiutigalugu sunngiffimmilu angalasartut tissiartaat LAUREL-imik taaguutilik eqqumaffigissagaat Kalaallit Nunaanni Politiit kaammattuutigaat. Tissiartaat assit naapertorlugit taartumik lakeererneqarsimavoq.
Tissiartaatip pingaartumik nunatta imartaata kujasissortaaniissinnaanissaa eqqumaffigeqquneqarpoq.
Tissiartaat takuneqassappat Kalaallit Nunaanni Politiinut nalunaarutigineqarnissaa kaammattuutigineqarpoq. Kalaallit Nunaanni Politiit oqarasuaataasa normoraat 70 14 48.