Politiit ullormut nalunaarutaat: Politiit tillinniartoqarnera ATV-nillu aallarussisoqarnera pillugu suli misissuisut
Nuummi neriniartarfimmi Street Foodimi pingasunngornermut unnuaani tillinniarfigineqarsimavoq, Sisimiunilu nunakkoorutit ATV-t aallarunneqarsimallutik. Kalaallit Nunaanni Politiit pigaartuisa pisortaat Carl Sværd KNR-imut taama oqarpoq.
- Kikkut pinerluttuusimanissaat suli ilisimanngilarput misissuiffigileruttorpavullu, taanna oqarpoq.
Unnuaq nalunaaquttap marluk pingasullu akornanni takunnissimasinnaasut politiinut saaffiginninnissaat taassuma taamaammat kaammattuutigaa.
- ATV-mik aallarussineq unnuaq nalunaaqutaq marluk qaangerlugit tanneq marluk missaanni nalunaarutigineqarpoq, ATV-lli suli nassaarineqanngillat, aallarussisorli kavaajaasamik nasartalimmik qernertumik kavaajaasaqarsimasoq politiit taamaallaat nalunngilaat, pigaartut pisortaasa oqaatigaa.
- Nuummi tillinniartoqarnera nalunaaquttap pingasut missaanni nalunaarutigineqarpoq, angutilllu inuusuttut sisamat tillinniartuunerarneqarlutik, kikkuunersulli ilisimannngilarput, Carl Sværd oqarpoq.
Street Foodimi suut tillinneqarsimanersut, tillittoqarsimanersorluunniit politiit suli ilisimanngilaat, piginnittulli qanorpiaq pisoqarsimaneranik paasisimasaqarnerulerpat tamanna ullup ingerlanerani paasinarsiumaartoq politiit pigaartuisa pisortaata oqaatigaa.
